Drejtuesit e qitjes shqiptare i kanë bërë ftesë për vizitë presidentit të Konfederatës së Azisë. Sekretari Mikerezi: “Na kanë pritur si rrallëherë, ndërsa kishim vetëm një njohje në Mynih”. Tashmë qitja shqiptare është kthyer nga pjesëmarrja në Çmimin e Madh të Kuvajtit, atje ku Arben Kuçana mori medalje bronzi në qitje me pistoletë 10 metra, si dhe ishte po pranë medaljes në qitje me pistoletë në distancë 50 metra. Për Sekretarin e Përgjithshëm të Federatës Shqiptare të Qitjes, Koço Mikerezi, delegacioni shqiptar është pritur në Kuvajt si në asnjë aktivitet tjetër ndërkombëtar.
“Me presidentin e Federatës së Qitjes së Kuvajtit, Sheikun Salman al Sabah, ne kishim vetëm një takim që ishte gjatë Kongresit Botëror në Mynih, – ka rrëfyer Mikerezi. – Përkundrazi jo vetëm që na kanë respektuar, por na ka pritur sikur të ishim të njohur prej vitesh. Duhet të dini që ai ishte pjesë e familjes mbretërore në Kuvajt. Ishte Ministër i Informacionit, Kulturës, Rinisë dhe Sportit, por njëkohësisht dhe Presidenti i Konfederatës Aziatike të Qitjes. Për rrjedhojë një njeri me shumë integritet dhe reputacion.”
“Në veprimtarinë ku morëm pjesë, jo vetëm që ishin të gjitha shtetet anëtare të Azisë, por dhe vende të Evropës. Kurse me ne na kanë respektuar shumë”, – ka shtuar Mikerezi, që ka bërë të ditur se tashmë i është bërë dhe ftesa zyrtare presidentit të Federatës së Qitjes së Kuvajtit, Sheikut Salman al Sabah, për të ardhur në Tiranë. “Por ka probleme, sepse duke qenë në rang ministror vizita e tij duhet bërë dhe respektuar si të ishte qeveritar, – ka kujtuar nr. 2 i organizmit që qeveris qitjen shqiptare. – Megjithatë bashkëpunimi me ta do të vijojë.”
“Më duhet të them që kompleksi i qitjes në Kuvajt ishte ndër të rrallët që kam parë dhe mund të them se një i tillë ka qenë vetëm në Kinë për Lojërat Olimpike të 2008-ës. Dhe për rrjedhojë mendoj se shumë shpejt do të kërkojnë zhvillimin e ndonjë Kupe Bote, apo dhe aktiviteti të rëndësishëm të qitjes”, – ka përfunduar Sekretari i Përgjithshëm i Federatës Shqiptare të Qitjes, Koço Mikerezi.
