Me vendimin e datës 30 dhjetor 2016, klubi shumësportësh “Studenti” do të paguajë rrogat qitëses që nga momenti i pezullimit deri në shpalljen e vendimit. Gjykata e Këshillit të Arbitrazhit Sportiv pranë KOKSH, më 30 dhjetor 2016, i ka dhënë të drejtë të pjesshme qitëses Lumturi Pepa. Kjo e fundit pat ngritur një padi ndaj Klubit shumësportësh Studenti për pavlefshmërinë e urdhrit të datës 30 maj 2016 të shefit të klubit, Blendi Nallbani, për ndërprerjen e marrëdhënieve financiare.
Madje pat kërkuar me detyrim pagesës e rrogave që nga momenti i ndërprerjes së marrëdhënieve më 20 maj 2016 deri në momentin e shpalljes së vendimit, si dhe detyrimin për kthimin e vazhdimit të stërvitjes si sportiste profesioniste pranë klubit “Studenti”. Para se të shkonte në KAS, Pepa i është drejtuar dhe Ministrisë së Arsimit dhe Sportit si institucioni që ka në vartësi Studentit.
Dhe në përgjigje, Ministria e Arsimit dhe Sportit nëpërmjet ministres Lindita Nikolla i ka sugjeruar vajtjen në KAS, pas së cilës ka ndodhur dhe ky lloj gjykimi. Klubi shumësportësh “Studenti” është përfaqësuar në këtë gjyq nga Diana Mata dhe Emine Çelirama. Dhe pasi kanë dëgjuar të gjitha palët, madje janë thirrur dhe drejtues të Federatës Shqiptare të Qitjes, atje ku në këtë gjyq ka shkuar Sekretari i Përgjithshëm Koço Mikerezi, që ka treguar gjithçka që lidhet me pjesën e pagesës së kësaj qitëse.
Sepse Pepa, të paktën sipas informacioneve që vijnë nga Federata Shqiptare e Qitjes, pat përfituar atë që pati lënë Lindita Kodra, ndonëse me ligj nuk i takonte, sepse së pari duhet të kesh titull ndërkombëtar për të përfituar jo vetëm rrogën, por dhe trajtimin ushqimor. Lindita Kodra të paktën deri më 2008-ën ishte nënkampione e Evropës. E megjithatë ajo çfarë ishte marrë nga Pepa qe vendosur që në kohën e drejtorit të sporteve në Ministrinë e Arsimit dhe Sportit, Vasil Bici.
E për të gjitha këto është kërkuar dhe dëshmia e Federatës Shqiptare të Qitjes. E në fund trupa e përfaqësuar nga Aldo Zadrima, Mariela Bërliku dhe Petrit Hamzaj pat vendosur kështu: Pranimin e pjesshëm të padisë si të pabazuar në ligj dhe në prova; detyrimin e klubit Studenti për të paguar në favor të palës paditëse pagën mujore të papaguar nga data e ndërprerjes së marrëdhënieve financiare deri në datën e shpalljes së vendimit nga ky trup gjykues.
Po kështu, ka vendosur rrëzimin e padisë për sa i përket pretendimeve të tjera të palës paditëse. E që nga 30 dhjetori 2016, kohë kur është shpallur ky vendim, trupa që është ankuar, apo dhe të gjitha palët e tjera brenda 90 ditëve mund të ankohen në Gjykatën e Arbitrazhit Sportiv në Lozanë.
