ASNN – E pati kërkuar më parë Italia, por ishte cilësuar si e parakohshme si kërkesë. Sidoqoftë, në dritën e zhvillimeve më të fundit nga epidemia e koronavirusit, ku rikthimi i mundshëm i veprimtarive sportive kushtëzohet nga koha e pamjaftueshme, mund të bëhet një përjashtim dhe të pranohet, qoftë edhe mbi baza të përkohshme. Në nëntor të vitit të shkuar, Federata Italiane e Futbollit pati aplikuar zyrtarisht që klubet e Serisë A të kenë mundësinë të kryejnë pesë zëvendësime në ndeshje.
Sikundër në shumicën dërrmuese të futbollit anembanë botës, edhe klubet e Serisë A aktualisht mund të kryejnë 3 zëvendësime për ndeshje. Presidenti i FIGC-së, Gabriele Gravina, pati dërguar kërkesën për rritjen e numrit të zëvendësimeve në Bordin e Shoqatës Ndërkombëtare të Futbollit (IFAB), që është organizmi që kontrollon “Rregullat e Lojës” së futbollit. Kërkesa synonte që të lejohej mundësia e kryerjes së 5 zëvendësime për ndeshje.
Sidoqoftë, kjo kërkesë nuk u pranua në mbledhjen e para pak ditëve të IFAB-it. Por realiteti i ri po dikton përjashtime nga rregulli dhe një zë ka ardhur edhe nga futbolli shqiptar. Është trajneri i Kukësit, Orges Shehi, ai që e ka risjellë në vëmendje këtë propozim. “Gjendja e krijuar nga koronavirusi patjetër që mund të ketë ndikim, është situatë e pajetuar më përpara, – ka thënë Shehi për mediat sportive në vend. – Dihet se kur mbaron kampionati, lojtarët marrin pushimet, dhe e dinë kur do të rifillojnë.”
“Por, ne nuk e dimë se kur do të rifillojmë, as kushtet nuk i kemi normalisht, – ka vijuar ai. – Do të jetë e vështirë, por e rëndësishme është të rifillojmë sa më shpejt futbollin. Ditët e para, pa u bërë kjo mbyllje e plotë, lojtarët sa kishin mundësi, e bënin stërvitjen e tyre, duke vrapuar. Megjithatë, stërvitja mungon, pasi me skuadrën është krejt ndryshe. Sidoqoftë, më mirë kaq sesa të fillojmë nga zero. Kalendari? Patjetër që do të jetë e vështirë me ngjeshjen e ndeshjeve.”
“Më të vështirë do e kemi ne, jo Tirana, – ka këmbëngulur korçare i stolit të verilindorëve. – Më i favorizuar, do të jetë ekipi që ka kontingjentin më të plotë.” E për këtë arsye, ish-portieri i njohur ka edhe një propozim për Federatën Shqiptare të Futbollit (FSHF). “Duke pasur një ngjeshje kalendari, pësohen dhe dëmtime, – ka kujtuar ai. – Shpresoj që skuadra të mos dëmtohet. Sidoqoftë, të gjithë do të nisim në kushte të barabarta.”
“Unë besoj se numri i kartonëve dhe procedurat, nuk mund të ndryshojnë. Mund të ndryshojnë zëvendësimet, të bëhen 5, – ka theksuar Shehi. – Por sidoqoftëë, kjo i përket Federatës për të vendosur, ne do të përshtatemi që të marrim maksimumin nga lojtarët. Në këtë periudhë ku jemi, gjithçka mund të ndodhë.” Propozimi i trajnerit të Kukësit mbështetet në një logjikë të pranueshme, teksa ndërprerja mund të kushtojë gjendjen e lojtarëve kur të kthehet kampionati.
Por, në anën tjetër, një propozim i tillë parashtron një tjetër çështje, atë të ndërrimit të rregullave të lojës teksa kampionati është në zhvillim e sipër. Përveç kësaj, sikundër e ka theksuar Shehi në fjalët e tij, por sikundër e kanë pohuar edhe specialistë të ndryshëm anembanë kontinentit evropian, një ndryshim i tillë i rregullores do të favorizonte skuadrat e mëdha kundrejt atyre të voglave, pasi klubet e mëdha kanë një kontingjent më cilësor dhe më të madh lojtarësh dhe do të përfitonin nga ndërrimet e shpeshta.
