Mundësi i njohur, tashmë trajner, komenton sjelljen e zyrtarëve të Komitetit Olimpike kundrejt sportistëve. Këto ditë Shqipëria merr pjesë në Lojërat Evropiane, i pari i këtij lloji, veprimtari që zhvillohet në Baku të Azerbajxhanit. FSHM çoi tre emra në KOKSH, por ky i fundit e ndryshoi njërin nga sportistët.
Mënyra si u bë mund të jetë objekt i madh debati, por KOKSH ka mangësi të kësaj natyre dhe, kur është fjala veçanërisht për bursat olimpike, kjo është diçka e hershme. Duke folur për këto probleme, mundësi i mirënjohur dhe njëherësh teknik i ekipit të mundjes së Tiranës, Sahit Prizreni, akuzoi dhe një herë zyrtarët e KOKSH-it se me veprimet e tyre të papërgjegjshme po dëmtojnë rëndë sportin në Shqipëri.
Ai përmend rastin e sportistit të tij Egzon Shala, të cilit iu mohua pa të drejtë bursa olimpike, ndërkohë që Prizreni akuzon dyshen drejtuese të KOKSH-it, Bezhani-Bello, se po përpiqen t’i vënë “shkopinj nën rrota” mundjes shqiptare dhe sportit shqiptar në tërësi.
Kjo është intervista e Sahit Prizrenit, dhënë të përditshmes sportive shqiptare “SOT”, dhe sot AlbanianSport.com do t’ju sjellë pjesën e parë, ndërsa në ditët në vijim do t’ju sjellim edhe pjesët e para
– Së shpejti zhvillohen Lojërat Evropiane, një eveniment sportiv për këtë vit, pasi zhvillohen për herë të parë dhe janë të ngjashme me Lojërat Olimpike. Shqipëria do të marrë pjesë, ndërkohë që edhe mundja ka konfirmuar prezencën e saj. Deshëm një informacion më të gjerë mbi përgatitjen e sportit tuaj Egzon Shala dhe objektivat. Çfarë prisni nga kjo veprimtari?
– Nuk kam shumë informacion në lidhje me këtë veprimtari, por e di që sportisti im, Egzon Shala, do të jetë pjesëmarrës. Gara jonë mund të jetë midis datës 19 dhe 21 qershor dhe ne po vijojmë përgatitjet për këtë veprimtari. Egzoni është stërvitur jashtë vendit dhe është sot për sot një nga pretendentët kryesore të ekipit tonë për medalje. Në fakt, sportisti ka pasur një dëmtim të lehtë, por shpresojmë të kalojë deri në ditën e garës. Unë si trajner i tij uroj që të shkojë gjithçka mirë e të futemi pse jo në zonën e medaljeve. Këtë medalje e dëshiroj shumë, pasi sportisti ka djersitur dhe është përgatitur fort, por në të njëjtën kohë ka vuajtur pasojat e një padrejtësie që i është bërë, e cila, siç e dini dhe ju, lidhet me mohimin e bursës olimpike.
– Vetëm Shala do të jetë nga mundja, apo pritet një pjesëmarrje më e gjerë?
– Përveç Egzon Shalës (Tirana) do të jetë edhe Islam Islamaj (Teuta) dhe Osman Hajdari (Tirana). S’na mbetet veçse të bëjmë më të mirën dhe të urojmë që të kemi rezultate të larta. Natyrisht, presioni psikologjik është i madh, pasi në çdo moment nuk na ndahen problemet që na i krijojnë njerëz të veçantë, të cilët në vijimësi përpiqen të shkatërrojnë punën tonë dhe, për habi, këta janë vetë drejtuesit e KOKSH-it.
– Pse? Çfarë ka ndodhur?
– Federata kishte propozuar në bazë të paraqitjes së sportistëve tre emra, ku njëri prej tyre ishte dhe Vilson Ndregjoni, por zgjedhjen përfundimtare e bëri KOKSH-i. Nuk e di si ka ndodhur, por kjo është diçka shumë e rëndë, është mbi të gjitha padrejtësi ndaj mundësit Ndregjoni. Sot është momenti të reagohet ashpër ndaj këtyre padrejtësive, pasi po jepet një shembull i shëmtuar i shkeljes së rregulloreve dhe po tentohet të anashkalohen sportistët më të mirë. Duke u kthyer tek sportisti im mund të them se pas daljes së peshëngritësve me doping dhe pezullimit të tyre, Egzon Shala është shpresa e Shqipërisë për një medalje dhe kualifikim direkt në Olimpiadë. Ky sportist ka bërë shumë dhe i takonte bursa, por Viron Bezhani dhe Stavri Bello (përkatësisht President dhe Sekretar i Përgjithshëm i KOKSH-it) hakmerren ndaj meje, duke dëmtuar sportistin dhe mund të shtoj se kështu po i vënë flakën sportit shqiptar. Janë dy persona, të cilët me veprimet e tyre po e shkatërrojnë sportin.
Vijon nesër…
