Presidenti i bardhebluve: “Kjo është java finale për të paguar atë detyrim që ne kemi ndaj këtyre futbollistëve, sepse as UEFA e as FIFA nuk presin më gjatë se çfarë kanë vendosur si afate. Janë detyrime të shkuara, gjë që s’ka për të ndodhur më për sa kohë të jem unë në krye.” Refik Halili, presidenti i Klubit të Futbollit Tirana, që tashmë ka në zotërim 66 % të aksioneve të klubit bardheblu, të dielën në mbrëmje ka qenë i ftuar në emisionin “Rubrika Sportive” në Radio Tirana.
Përtej kësaj, 6 pikët e fituara në dy ndeshjet e para të fazës së 3-të të kampionatit, vendi i 3-të në renditje, problemet e administrimit dhe borxhet që Tirana ka ndaj Kastratit (lojtar që ka luajtur vetëm 12 minuta me kryeqytetasit), kanë qenë në fokusin e diskutimit në linjë telefonike me presidentin e bardhebluve, Refik Halili. “Kjo do të jetë java jonë finale, – ka thënë ai, – për ta shpëtuar përfundimisht Tiranën nga borxhet, në mënyrë që të vijojmë kampionatin dhe të kemi ato pikë të cilat kemi merituar të marrim deri më tani.”
“ Të jeni të bindur që, si UEFA, ashtu dhe FIFA, janë organe që nuk presim në shumë se afati që kanë vendosur për të shlyer ato detyrime që rrjedhin nga gjyqet e fituara prej lojtarëve, – ka pohuar Halili në vijim. – Janë probleme të kontratave të mbartura në kaosin që ka qenë më parë Tirana, ndërsa jemi të detyruar të merremi dhe me këto. Por unë për një gjë ju siguroj, Tirana, për sa kohë do të jem unë president, nuk do të ketë asnjë borxh.”
“Deri më tani janë shlyer të gjithë dhe ka mbetur dhe diçka që unë shpresoj ta zgjidh në favor të Tiranës”, – ka përfunduar kreu i bardhebluve të kryeqytetit. Problemi është se nëse Tirana, apo dhe Bylis, nuk do të shlyejnë gjyqet e prapambetura, gjë që vjen nga hedhja në gjyq prej kontratave të pashlyera sidomos me lojtarët e huaj. Deri më tani e ka pësuar Flamurtari në Kategorinë Superiore, shpëtoi Vllaznia për pak, kurse në Kategorinë e Parë, peng i këtyre borxheve të pashlyera kanë mbetur Kastrioti dhe Dinamo.
