ASNN – Portugezët kishin premtuar se do ta mundin Portugalinë, pra që do të jepnin më të mirën e tyre në fushë për të siguruar direkt “biletën” për në “Francë 2016″ dhe e kanë mbajtur fjalën. Portugalia i ka bërë një “dhuratë” Shqipërisë, duke mposhtur Danimarkën 1-0. Kjo nënkupton se pavarsisht humbjes ndaj Serbisë, Shqipëria i ka ende të gjitha mundësitë për të shkuar direkt në Euro 2016, pasi Portugalia mposhti 1-0 Danimarkën, rivalen direkte të kombëtares kuqezi.

“Duam të luajmë për të fituar, ashtu siç bëjmë në çdo ndeshje dhe ky takim nuk bën përjashtim, – pati thënë për mediat portugeze në prag të sfidës së mbrëmshme mesfushori Zhoao Mutinjo i Monakos, që është rikthyer në përfaqësuesen portugeze. – E dimë se do të na mjaftonte edhe një pikë por e ritheksoj, ne duam të fitojmë.” Dhe ka qenë pikërisht ky lojtar ai që ka firmosur fitoren e portugezëve.

Luzitanët e dominuan takimin, ndërsa goli i fitores për ta dhe që i mban ende gjallë shpresat e Shqipërisë, u shënua nga Mutinjo në minutën e 66-të të ndeshjes. Me këtë fitore, Portugalia është tashmë e kualifikuar në Euro 2016, madje ka siguruar edhe vendin e parë me 18 pikë, ndërsa Danimarka ndodhet e dyta në grup me 12 pikë, një më shumë se Shqipëria, por danezët i kanë përfunduar ndeshjet e tyre në grup.

Kombëtarja shqiptare e futbollit ka edhe një ndeshje për të mbyllur këto eliminatore dhe ka mundësinë më të mirë për t’i finalizuar ato me kualifikimin historik, aq të pritur për të gjithë. Ditën e diel Shqipëria do të luajë në Armeni ndaj vendase dhe një fitore në këtë ndeshje do të thoshte kualifikim direkt për në Francë, ndërsa çdo rezultat tjetër e çon kombëtaren tonë në fazën e “play-off”-it.