Avni Ponari, presidenti i Federatës Shqiptare e Basketbollit, në një rrëfim ekskluziv të hënën për emision “Skaner” të televizionit informativ shqiptar, “Ora News”, ka folur edhe për trajnerët e përfaqësueseve të koshit shqiptar. “Nuk është se nuk kam gjetur unë karar, por trajnerët s’kanë gjetur karar me kombëtaren dhe për shkak të rezultateve janë larguar”. Kështu e ka nisur rrëfimin e tij Ponari për trajnerin e kombëtares, teksa ka bërë të ditur se brenda shkurtit do të jetë i emëruar. “Ne jemi duke bërë përpjekje për të gjetur një trajner të huaj për të dy ekipet e rritura dhe të rritura”, – ka pohuar ai.
“Mua do të më pëlqente të kishim një trajner të kompletuar shqiptar, por duke pasur përvojën e vitit të kaluar me ekipet e moshave shpresojmë ta gjejmë, – ka vijuar presidenti i koshit shqiptar. – Kemi kërkesa dhe shumë shpejt do ta vendosim. Unë do ta pranoja dhe vetëofrimin dhe unë do ta mbështesja. Aktualisht trajnerin e femrave e kemi pa kontratë. Por e vërteta është se kemi bërë një trajnim me trajnerë e gjyqtar dhe ata më të vjetrit duket se nuk kanë ardhur se i dinë të gjitha gjërat. Ne na duhet një trajner që të bëjë një përzgjedhje të mirë.”
“Ashtu siç më thanë në Beograd trajneri serb, i cili zgjidhte ata që bëjnë lojën e grupit dhe jo individualistët” , – theksoi kreu i FSHB-së. Ponari nuk pranon që të ketë pasur divergjenca me Cukën, por pranon se së bashku me kryesinë do të vendosin për trajnerin e ri. Madje e thotë dhe datën 15 shkurt. “Unë jam i ndjeshëm për moshat, – këmbëngul ai. – Mirëpo nuk kemi në dorë terrenet, ndërsa unë dhe Ilir Taflaj kemi financuar ekipet kombëtare. Ashtu siç kemi futur dhe idenë e sponsorizimin nga prindërit”.
Madje Ponari shkon dhe më tej se sikur të mos kishte gjetur mbështetjen e kryesisë për pjesëmarrjen e këtyre kombëtareve atëherë do ta fuste Federatën në zgjedhje të reja. “Brenda shkurtit do të nisim përzgjedhjet me trajnerët dhe detyrimet e tyre. Presim rezultate të mira sikurse kërkojmë të marrim dhe ndonjë fitore, por vetëm duhet të heqim ndjenjën e inferioritetit”, – ka përfunduar presidenti i Federatës Shqiptare e Basketbollit.
