ASNN – Ai është një nga pikat kryesore të cilit i referohet shumëkush në Shqipëri gjatë kësaj krize të shkaktuar nga virusi “Covid-19” dhe nuk ka ngurruar që shpesh ta thotë mendimin e tij i pavarur nga rryma apo rrethanat. Por Pëllumb Pipero duket i bindur, teksa thotë që futbolli duhet lejuar të nisë i pari. Dilema rreth rifillimit të futbollit në vendin është e madhe.
Aktorët e lojës më të bukur në botë, po presin me padurim rikthimin në fushë, për t’u stërvitur dhe mbyllur sezonin e lënë përgjysmë. Mjeku i njohur i Spitalit Infektiv në Tiranë, Pëllumb Pipero ka dhënë mendimin e tij në emisionin “Opinion” në TV Klan. Ai thekson se futbolli është i pari që duhet të rikthehet dhe shpjegon se pse rreziku i infektimit është i vogël.
“Ka shumë pikëpyetje për punën e futbollit, vendimet i marrin institucionet, – ka thënë ai gjatë emisionit në fjalë. – Nëse do pyetesha unë, do të thosha që ata janë të parët që duhet të lejohen, qoftë për stërvitjen, qoftë për ndeshjet. Natyrisht duke marrë disa masa të nevojshme, që janë të domosdoshme. Që të infektohesh me COVID-19 duhet 15 minuta ekspozim i pandërprerë midis personit të infektuar e një tjetri të painfektuar.”
“Asnjëherë nuk ndodh, as në stërvitje, as në fushë, – ka vijuar specialisti i njohur i sëmundjeve infektive. – Në futboll nuk rrinë kurrë statik për kaq kohë. Po të marrin masa që të dezinfektohen topat e futbollit, të lajnë edhe duart, mund të realizohet. Ky është një mendim që e jep një specialist, vendimet i marrin autoritetet.” Ky opinion i mjekut të njohur mbetet sidoqoftë në kuadrin e mendimit personal.
