ASNN – Dje në palestrën e peshëngritjes të fshatit Shtërmen, atje ku që nga mesi i janarit është duke u përgatitur kombëtarja e shtangës për të marrë pjesë në Kampionatin Evropian të Të Rriturve, që do të mbahet në prill në Norvegji, është zhvilluar gara e radhës e kontrollit. Në këtë garë kontrolli kanë qenë si zakonisht të pranishëm presidenti i Federatës Shqiptare të Peshëngritjes, Elez Gjoza, dhe Sekretari i Përgjithshëm Agron Haxhihyseni.
Por në këtë garë është bashkuar dhe Erkand Qerimaj, së bashku me trajnerin e tij Zef Kovaçi, ndërsa në të gjithë këtë periudhë shtangisti shkodran është përgatitur në Tiranë. Gara e kontrollit ka qenë mjaft interesante dhe tepër e bukur, ndërsa nuk kanë munguar dhe ovacionet e të pranishmëve, që ishin të shumtë. Të tetë sportistët, 6 meshkujt dhe dy femrat, u testuan në peshat e veta dhe gjithçka ka shkuar mjaft mirë sa i përket paraqitjes.
Kjo gjë ka kënaqur dhe presidentin e Federatës Shqiptare të Peshëngritjes, Elez Gjoza, i cili i ka falënderuar sportistët për formën e mirë të treguar në këtë garë kontrolli. Në këtë garë kontrolli ka rënë në sy peshëngritësi shkodran i peshës trupore deri në 77 kg, Erkand Qerimaj, i cili ka treguar se është një peshëngritës i madh. Ai ka arritur rezultate të mira në këtë garë, teksa në shkëputje ka ngritur 155 kg dhe në shtytje 195 kg duke marrë dhe përqafimet e trajnerit të tij Kovaçi dhe të familjarëve të vetë.
Garë të mirë ka bërë dhe peshëngritësit “autoktonë”, Briken Calja i peshës 69 kg dhe Endri Karina i peshës 94 kg, teksa të dy së bashku kanë arritur rezultate të kënaqshme. Calja ka ngritur 145 kg në shkëputje dhe 181 kg në shtytje, ndërsa Karina 165 kg në shkëputje dhe 195 kg në shtytje. Për vajzat ka shkëlqyer Evangjeli Veli, që në shkëputje ngriti 86 kg dhe në shtytje 105 kg.
