ASNN – Skënderbeu për femra dhe Teuta për meshkuj janë kampionët e Shqipërisë në peshëngritje për të rritur. Kampionati Kombëtar, i cili u zhvillua në fundjavë në Pallatin e Sportit “Asllan Rusi” në kryeqytet, u karakterizua nga konkurrenca e fortë, ndërsa në bazë të rezultateve të tij do të përcaktohet edhe përbërja e ekipit tonë përfaqësues në Botërorin e nëntorit në Kazakistan.
Sporti më i suksesshëm shqiptar në arenën ndrëkombëtarje, peshëngritja, ka mbajtur të shtunën Kampionatin e saj Kombëtar për Të Rritur, që u zhvillua në Pallatin e Sportit “Asllan Rusi” në Tiranë. Në fakt, i gjithë kampionati ka qenë këtë radhë i një niveli ndërkombëtar. Duke nisur që nga ceremonia e hapjes, nga pajisja e të gjitha skuadrave pjesëmarrëse me uniforma nga ana e Federatës Shqiptare të Peshëngritjes, e duke vijuar me kohë elektronike, rezultate të pasqyruara në monitor, pedana e garës e ndarë nga salla e nxehjes dhe gjithçka tjetër i ka ngjarë një gare të vërtetë ndërkombëtare.
Kampionati, i cili si rrallëherë në këto vitet e fundit është zhvilluar mbi bazën e një norme kualifikuese, ka patur konkurrencë të jashtëzakonshme dhe në të morën pjesë 5 ekipe femrash dhe 13 ekipe meshkujsh. Gara më emocionuese ka qenë ajo e peshës 77 kg për shkak të duelit mes Daniel Godellit dhe Hysen Pulakut, teksa ky i fundit kthehej në gara pas dy vjetësh mungesë. Ka fituar Godelli, i cili në shkëputje ka thyer pas 15 vjetësh rekordin e Ilir Sulit, tashmë në shifrat e reja 166 kg.
Në shtytje është i padiskutueshëm, teksa me 192 kg është kampion. Ndërkohë që Erkand Qerimaj, pasi ka ngritur 155 kg në shkëputje, është dëmtuar në bërrylin e majtë, teksa ka garuar në peshën 85 kg. Në provën e dytë në shkëputje ai ka tentuar të ngrejë 160 kg, por është dëmtuar dhe më pas është tërhequr nga gara. Në përfundim, Skënderbeu për femra dhe Teuta për meshkuj janë kampionët e Shqipërisë në peshëngritje për të rritur.
Kampionati Kombëtar i Peshëngritjes
Rezultatet dhe fituesit:
Femra
Pesha 48 kg
Ana Jovani (Skënderbeu) 45 kg 50 kg 95 kg
Pesha 53 kg
Shqiponja Brahja (Shtërmeni) 82 kg 90 kg 172 kg
Evangjeli Veli (Skënderbeu) 57 kg 75 kg 132 kg
Pesha 58 kg
Sherjana Rucci (Tirana) 65 kg 77 kg 142 kg
Pesha 63 kg
Maria Veli (Skënderbeu) 45 kg 55 kg 100 kg
Pesha +75 kg
Besarta Kollozi (Tirana) 61 kg 70 kg 131 kg
Manjola Karaj (Partizani) 50 kg 65 kg 115 kg
Marjela Bajrami (Apolonia) 69 kg – –
Sportistja më e mirë: Shqiponja Brahja
Renditja ekipore:
- Skënderbeu 243 pikë
- Tirana 165 pikë
- Shtërmeni 84 pikë
Meshkuj
Pesha 56 kg
Bruno Muha (Teuta) 95 kg 120 kg 215 kg
Pesha 62 kg
Emanuel Lushi (Vllaznia) 115 kg 135 kg 250 kg
Pesha 69 kg
Alban Hoxha (Elbasani) 130 kg 150 kg 280 kg
Pesha 77 kg
Daniel Godelli (Tirana) 166 kg 192 kg 358 kg
(rekord kombëtar në shkëputje)
Pesha 85 kg
Krenar Shoraj (Apolonia) 155 kg 190 kg 345 kg
Pesha 94 kg
Sopot Sula (Teuta) 156 kg 180 kg 336 kg
Pesha 105 kg
Saimir Meta (Weightlifting Elbasani) 135 kg 155 kg 290 kg
Pesha +105 kg
Edison Elmazi (Flamurtari) 142 kg 170 kg 312 kg
Sportisti më i mirë: Daniel Godelli
Renditja ekipore:
- Teuta 598 pikë
- Weightlifting Elbasani 335 pikë
- Tirana 253 pikë
