ASNN – Peshëngritësi Sopot Sula ka përmendur edhe lënien jashtë Evropianit të Izraelit. Sipas 21-vjeçarit, në atë garë ndërkombëtare pjesëmarrja e delegacionit ka qenë më tepër turistike dhe se nga 6 veta që përbëhej, vetëm një ishte sportist. “Më hoqën nga Evropiani i 20-vjeçarëve që u zhvillua në Izrael me pretekstin që nuk donin të harxhonin nga taksat e shqiptarëve, sepse unë do të dilja i 16-ti”, – ka deklaruar ai për të përditshmen sportive shqiptare, “Panorama Sport”.
“Megjithatë, atje delegacioni ishte i përbërë nga 6 veta, nga të cilët vetëm njëri ishte sportist, ndërsa të tjerët ishin kthim “qoke”, meqenëse e votuan këtë federatë, – ka vijuar shtangisti. – Po kjo nuk quhej shpërdorim fondesh dhe përfundimi ishte një dështim absolut, zero medalje, zero dygarësh. Shkuan si turistë dhe u kthyen si të tillë.” Sula pretendon se kësaj federate i interesojnë servilët dhe jo vendet e nderit në podiumet ndërkombëtare.
“Kësaj federate nuk i interesojnë medaljet, i interesojnë servilët, – ka theksuar ai. – Nëse unë do të merrja pjesë në atë Evropian, më e pakta do të ishte që nuk do ta ktheja atë delegacion si turistë, por do ta justifikoja me një medalje sikur edhe bronzi. Pasi, me rezultatet e ngritura në garën e Tiranës në muajin mars në 2016-ën, unë kisha dy medalje të sigurta. Por, ç’rëndësi ka kjo për këtë federatë?! Ata janë aty për të treguar që federata është prona e tyre dhe mund të bëjnë çfarë të duan me të.”
Në fund të deklaratës për të përditshmen në fjalë, Sula ka dyshimet e tij për përfaqësimin e Shqipërisë në Evropianin e Të Rinjve dhe Nën-23-vjeçarëve, që do të zhvillohet në Tiranë nga data 15, deri më 22 tetor 2017. “Sidoqoftë, Evropiani i Të Rinjve dhe Nën-23-vjeçarëve zhvillohet këtë vit në Shqipëri dhe do të shohim sa medalje do të marrë kjo federatë diktatoriale me luftën e saj kundër fjalës së lirë dhe në mbështetje të servilëve dhe pseudo-sportistëve”, – ka përfunduar ai.