Nga gjashtë sportistë të deklaruar për pjesëmarrje në Kampionatin Evropian për Nën-23-vjeçarët dhe Të Rinj, që po zhvillohet në Limasol të Qipros, peshëngritja shqiptare është shkurtuar vetëm në tre konkurrentë. Kështu kampioni i botës në peshëngritje për të rritur, Daniel Godelli, ashtu siç dhe kishte deklaruar më parë, nuk do të marrë pjesë në këtë Evropian.
Të paktën edhe sipas sekretarit të përgjithshëm të Federatës Shqiptare të Peshëngritjes, Muharrem Berisha, Godelli ka vazhdon ta ketë dëmtimin në bërryl, që do të ishte shumë e rrezikshme nëse do ta lëndonte dhe në këtë Evropian. “Tani objektivin kryesor që ne kishim, pra daljen “kampion bote” me Danielin e realizuam. Kështu që nuk kishte më vlera për t’u sforcuar dhe një herë në një garë të tillë”, – ka thënë Berisha.
Ndërkohë që nëse Godelli do të ishte për garë sot pasdite ai do të ngjitej në pedanën e Limasolit, ndërsa në deklarimin paraprak ishte 360 kg në dygarësh. Ndërkohë ata që do të marrin pjesë në këtë Evropian janë Hysen Pulaku, Sopot Sula dhe Aleks Kaçani, ndërsa trajnerë të ekipit kombëtar Kastriot Rukaj dhe Sokol Bishanaku dhe përgjegjës delegacioni Agron Haxhihyseni.
Pulaku konkurron të enjten në peshën 85 kg për Nën-23-vjeçarët, në ora 14:30, ndërsa deklarimin në dygarësh e ka 370 kg. Po të enjten, por tashmë për të rinjtë në peshën 94 kg, konkurron Sopot Sula, i cili ka deklaruar 340 kg në dygarësh. Dhe të premten e mbyll garimin për Shqipërinë në këtë Kampionat Evropian, Aleks Kaçani në peshën 94 kg për Nën-23-vjeçarët, në ora 12:30, ndërsa në deklarimin e tij në dygarësh ka pohuar 345 kg.
“Ne mund të kishim çuar dhe të tjerë, por dërguam këto sepse jemi të bindur se janë më pranë medalje”, ka përfunduar sekretari Berisha, kurse Shqipëria e peshëngritjes është tashmë gati për aktivitetin e fundit ndërkombëtar të vitit 2014.
