ASNN – Skandali i dopingut në peshëngritjen shqiptare po merr gradualisht trajtë zyrtare, pasi edhe testi B i analizës së sportistes sonë, Romela Begaj, ka rezultuar pozitiv për përdorimin e substancës së ndaluar të “stanozololit”. Një gjë e tillë është mësuar të premten pasdite dhe është konfirmuar zyrtarisht për AlbanianSport.com nga burime në Ministrinë e Arsimit dhe Sportit.
Para dy javësh, në një publikim të shkurtër në faqen e saj në Internet, Federata Ndërkombëtare e Peshëngritjes (IWF) ka bërë të ditur se peshëngritësja shqiptare, Romela Begaj, e cila fitoi titullin botëror në Kazakistan, ka rezultuar pozitive në testin e antidopingut me substancën e ndaluar “stanozolol”. Federata Ndërkombëtare bën të ditur gjithashtu se për pasojë, sportistja do të pezullohet për momentin në pritje të kryerjes së testit B dhe dëgjimit të versionit të saj në apel.
Romela e cila u shpall në fillim të nëntorit në Kazakistan në stilin e shkëputjes, duke ngritur 113 kilogram ishte peshëngritësja e parë shqiptare në histori që fitoi një titull botëror. Por përgjigja e testit B, e cila ka mbërritur të premten pasdite në zyrat e Federatës Shqiptare të Peshëngritjes, dhe, më pas, edhe në Ministrinë e Arsimit dhe Sportit, ka hedhur poshtë çdo dyshim dhe tashmë pritet të mësohet edhe masa e dënimit të sportistes Romela Begaj.
Drejtori i Sporteve në MAS, Vladimir Gjonaj, ka pohuar për AlbanianSport.com në zyrën e tij ka mbërritur rreth orës 16:00 një “e-mail” nga ana e organizmit që qeveris peshëngritjen shqiptare, FSHP, ku pohohet se edhe testi B i analizës së antidopingut ka konfirmuar se Romela Begaj ka rezultuar pozitiv për përdorimin e hormonit sintetik mashkullor, “stanozolol”. “Po, ka ardhur një konfirmim i tillë dhe tashmë pritet të njihet edhe masa e dënimit të sportistes, që duhet të mësohet në ditët në vijim”, – theksoi Gjonaj.
