Organizimi i Kampionatit Evropian për Të Rinj dhe Nën-23-vjeçarët, seminarët shkencorë për trajnerët dhe gjyqtarët në bashkëpunim me Italinë dhe Komitetin Olimpik të shtetit të Apenineve janë projektet e reja.
Pasi e ka falënderuar presidentin e Federatës Evropiane të Peshëngritjes, Antonio Urson, për vizitën e tij të parë në Tiranë, Elez Gjoza ka vlerësuar se mbështetja e ndërkombëtarëve do të jetë e pakursyer.
“Peshëngritja shqiptare ka siguruar pjesëmarrjen e saj në Lojërat Olimpike “Rio de Zhaneiro 2016” me dy sportistë, që janë Briken Calja dhe Erkand Qerimaj, dhe tanimë pret një të tretë”, – ka pretenduar Gjoza.
“Do të marrim të gjitha masat për një stërvitje shkencore për përgatitjen e tyre e kjo edhe me ndihmën e Komitetit Olimpik Kombëtar Shqiptar dhe presidentit të saj Viron Bezhani”, – ka vijuar ai.
“Jo vetëm kaq, por do të vijojmë dhe me testet antidoping, sepse tashmë kemi zero raste, – ka shtuar presidenti i FSHP-së. – Mbështetja e Ursos me bazë materiale dhe me trajnime do të jetë një plus tjetër për ne.”
“Kurse stërvitja me bazë shkencore dhe vetë kjo konferencë në Akademinë e Shkencave tregon që peshëngritja shqiptare ka hyrë në të tjera nivele”, – ka përfunduar kreu i organizmit që qeveris shtangën shqiptare, Elez Gjoza.
