ASNN – Në një prononcim për të përditshmen sportive shqiptare, “Sport Ekspres”, presidenti i Federatës Shqiptare të Peshëngritjes, Elez Gjoza, është shprehur optimist për rezultatet që do të arrijnë sportistët tanë në Amerikë. “Më kënaqi shumë forma e Caljes në garën e kontrollit, – ka deklaruar ai. – Ai rikthehet në një garë ndërkombëtare pas dy vjetësh, teksa ishte i dënuar dhe mesa shoh Brikeni nuk do të rikthehet duarbosh nga Hjustoni i Shteteve të Bashkuara të Amerikës.”
“Pra, synimi ynë është që të marrim medalje në këtë Kampionat Botëror, ku konkurrenca është shume e madhe, – ka vijuar kreu i shtangës kuqezi. – Por ne nuk u trembemi aspak kundërshtarëve tanë që janë shumë. Calja ka ditë që po stërvitet intensivisht me dy seanca në ditë nën drejtimin e trajnerit të palodhur Leonard Toska, të cilin e falënderoj nga zemra për atë që po bënë për këtë sportistë elitarë të kombëtares sonë.”
“Ai i ka të gjitha kushtet e nevojshme në fshatin e vogël që nxjerrë talente të mëdha dhe besoj se do na nderojë në këtë garë, – ka theksuar Gjoza. – Shoh në sytë e tij që është i uritur për medalje. Briken Calja, përpara ca ditësh në kampionatin që u zhvillua në Tiranë, doli sportisti më i mirë i aktivitetit me një rezultat shumë të mirë. Kështu që ai është gati për provën e madhe në Amerikë. Falënderoj kryebashkiakun e Cërrikut Altin Toska që i ka qëndruar pranë sportistit duke i krijuar të gjitha kushtet e nevojshme ku nuk i mungon asgjë”.
Në përfundim të fjalëve të tij presidenti i Federatës Shqiptare të Peshëngritjes, Elez Gjoza, është shprehur se do ta festojmë suksesin nëse ai vjen që në Rinas. “Ndaj me atë rast i ftoj që tani të gjithë përkrahësit e Caljes e Qerimajt që të jenë në Aeroportin “Nënë Tereza” Rinas ditën kur ata të kthehen nga Amerika me medalje”, – përfundoi ai.
