ASNN – Përkundër asaj që pritet dhe besohet, Federata Shqiptare e Peshëngritjes ka këmbëngulur se përgjigjja e testit B për 2 peshëngritësit e tjerë, Hysen Pulaku dhe Daniel Godelli, ende nuk ka ardhur dhe do të publikohet vetëm kur të vijë në mënyrë të detajuar.

“Ne nuk u kemi fshehur mediave, në mënyrë absolute, por nuk kemi ende një përgjigje të testit B të Hysen Pulakut dhe Daniel Godellit, – ka pretenduar president i FSHP-së, Elez Gjoza. – Duhet kjo broshurë prej 75 fletësh, e cila është e mbushur me detaje për çdo, dhe që i përket Romela Begajt.”

“Në momentin që do t’i kemi siç kemi edhe këtë, atëherë do t’i publikojmë”, – shtoi zv/presidenti i FSHP-së, Ilir Kulla. Madje Gjoza ka deklaruar se do të hedhë në gjyq Federatën Botërore të Peshëngritjes, e cila ka shkelur të gjitha rregullat në lidhje me kampionin e botës, Daniel Godelli.

“Përgjigjja e testit A të Daniel Godellit na ka ardhur neve në Federatë pas 28 ditësh, kur rregulli është brenda 21 ditëve, – theksoi ai. – Ne do t’i hedhim në gjyq, se përse vjen një përgjigje 7 ditë pas rregullit. Absolutisht që ne do t’i shkojmë deri në fund kësaj historie, për të nxjerrë të vërtetën.”

Presidenti Gjoza u ka dhënë fund dyshimeve dhe thashethemeve për një pezullim apo përjashtim të Federatës sonë nga veprimtaritë ndërkombëtare. Madje, Gjoza thekson se medaljet do të vazhdojnë të vijnë në Shqipëri, ashtu si më parë, duke thënë: “Federata e Peshëngritjes nuk është dënuar momentalisht dhe ju garantoj se nuk do të dënohet.”

“Ne do të marrim pjesë në Evropian, absolutisht në Olimpiadë, por edhe në Botëror. Dhe përsëri do të vijmë me medalje nga këto veprimtari”,- deklaroi presidenti i FSHP-së. Pezullimi i këtyre 3 sportistëve pritet të vazhdojë të paktën deri në maj, kur të dalin para panelit të dëgjimit, dhe i vetmi peshëngritës elitar nga i cili mund të presim medalje mbetet Erkand Qerimaj.