ASNN – Një “Chek-up” i përgjithshëm është bërë dje në mëngjes për kombëtaren e peshëngritjes, e cila prej disa ditësh është duke u përgatitur në Shtërmen për Kampionatin Evropian të Të Rriturve në Oslo në Prill. Ministria e Shëndetësisë, edhe duke qenë se zëvendësministri i saj Klodian Rrepaj që nga 23 janari është anëtari i kryesisë së Federatës Shqiptare të Peshëngritjes, ka vënë në dispozicion një autoambulancë lëvizëse.
Dhe menjëherë të gjithë peshëngritësit i janë nënshtruar analizave të gjakut dhe të urinës. Por mbi të gjitha është bërë dhe matja e aktivitetit të zemrës (EKG), apo dhe aktiviteti i mëlçisë dhe i veshkave. Mbi të gjitha për secili peshëngritës të kombëtares tashmë është krijuar dhe dosja mjekësore, atje ku janë të shënuara zhvillimet e planeve individuale që lidhen me mbarëvajtjen e ushqimit, si dhe jepen porositë për ndjekjen e parametrave fizikë dhe psikologjik të këtyre sportistëve.
Këtij kontrolli të rreptë mjekësor i janë nënshtruar dy vajzat, Ana Jovani dhe Evangjeli Veli, e më pas dhe 13 djemtë e kombëtares. Për të ndjekur të gjithë këtë kontroll mjekësor të kombëtares së shtangës, përveç doktorëve dhe infermierëve, kanë qenë prezent zëvendësministri i Shëndetësisë, Klodian Rrepaj, si dhe presidenti i Federatës Shqiptare të Peshëngritjes, Elez Gjoza, apo dhe Sekretari i Përgjithshëm i këtij institucioni, Agron Haxhihyseni.
Pa harruar këtu presidentin e nderit të Federatës Shqiptare të Peshëngritjes, Gudar Beqiraj. Madje kontrollit mjekësor i janë nënshtruar edhe katër trajnerët e kombëtares me në krye Leonard Toska. Ndërkohë është bërë e ditur se për kombëtaren e peshëngritjes përpara nisjes për në Oslo do të ketë disa kontrolle antidoping. Dhe për t’i dalë përpara së keqes, kjo edhe në anën shëndetësore të sportistëve, është bërë ky kontroll i përgjithshëm mjekësor i peshëngritësve.
