Akuzat e bëra publike nga ish-kampioni i botës në peshëngritje më 2014-ën në Almati të Kazakistanit, Daniel Godelli, ndaj Federatës Shqiptare të Peshëngritjes dhe ndaj ish-trajnerit të kombëtares Luan Shabani kanë sjellë reagimin e drejtuesve më të lartë të shtangës shqiptare. Pikërisht presidenti i Federatës Shqiptare të Peshëngritjes, Elez Gjoza, heq çdo përgjegjësi nga vetja.

“Unë nuk e mendova të udhës që ekipi të udhëtonte drejt Greqisë. Nëse Shabani do të vinte në Shqipëri do të ishte edhe nën kontrollin e mjekëve tanë. Danieli në këtë histori është i pafajshëm”, shprehet Elez Gjoza për “Top Channel”. Për të vërtetuar mosbesimin e tij, Gjoza ka kërkuar që për këtë shërbim të Luan Shabanit të hartohet një kontratë shërbimi me firmat e të dy palëve.

“Nëse vendosej që ekipi të shkonte unë doja një kontratë, ku dikush të mbajë një përgjegjësi penale, financiare, – ka vijuar kreu i FSHP-së. – Edhe Sekretarin e mëparshëm të Federatës, Muharrem Berishën, e kam autorizuar dhe ka shkuar të bëjë një kontratë me Luan Shabanin që mban përgjegjësi morale dhe penale.” Ekziston edhe një kopje e kontratës së shërbimit të Luan Shabanit me Federatën Shqiptare të Peshëngritjes.

Sipas kësaj kontrate, theksohet përgjegjësia ligjore dhe morale në rast mosplotësimi të kushteve, apo për përdorim të substancave gjatë kësaj periudhe. Kjo është një nga arsyet për të cilat as Daniel Godelli dhe as Elez Gjoza nuk kanë asnjë përgjigje. “Unë kam kërkuar vazhdimisht shpjegime nga Luan Shabani, – thotë Gjoza. – Kam pasur një kontakt fizik me atë.”

“Kam udhëtuar për gjithë natën. Pasi mbeta i shokuar nga lajmi, Luan Shabani nuk më shprehej dot si ka ndodhur”, – ka përfunduar Presidenti i Federatës Shqiptare të Peshëngritjes, Elez Gjoza, i cili, në fakt, me shpjegimet e tij të mjegullta, që për më tepër nuk sjellin asgjë të re, sepse janë të përsëritura, më tepër e ka lënë çështjen në errësirë, sesa e ka sqaruar atë.