Trajneri: “Jemi për medalje në Lituani, Shoraj për të artë, Hoxha të argjendtë dhe Lushi të bronztë. Por kush del pozitiv nuk ngjitet në avion”. Kombëtarja e të rinjve, e cila në Evropianin e Klaipedias në Lituani do të përfaqësohet tek të rinjtë nga Alban Hoxha në peshën 69 kg dhe Emanuel Lushi në peshën 62 kg, si dhe Krenar Shoraj tek Nën-23-vjeçarët në peshën 85 kg.
Sipas trajnerit Çela, kjo kombëtare me këta tre sportistë ka dhjetë ditë që është e grumbulluar dhe është duke bërë stërvitje në palestrën e ekipeve kombëtare në Shtërmen. “Ushqimin e konsumojmë në restorantin e Bashkim Belshit, kurse qëndrojmë të akomoduar në hotel “Xhelili” në Cërrik, – thotë ai. – Dhe ka të ngjarë që po në të njëjtin vend të jetë dhe kombëtarja e të rriturve, para se të shkojë në Botërorin e Hjustonit.”,
Çela ka dhënë dhe deklarimet e të tre peshëngritësve për sa i përket dygarëshit. Sipas elbasanasit të peshëngritjes, Alban Hoxha në peshën 69 kg do të jetë 295 kg, Krenar Shoraj në peshën 85 kg, 340 kg në dygarësh dhe Emanuel Lushi në peshën 62 kg do të jetë 300 kg në dygarësh. “Shoraj është për medalje ari në Klipedia të Lituanisë, Hoxha për medaljet e argjendta dhe Lushi për të bronztat.
“Është e sigurt që pa medalje ne nuk vijmë nga kjo veprimtari”, – ka përfunduar Çela, ndërsa kuqezinjtë e shtangës udhëtojnë më 2 tetor drejt Klaipedias së Lituanisë. Por më parë duhet të dinë se ku janë me kontrollin antidoping, përgjigjet e të cilit pritet të vijnë pas dy ditësh.