ASNN – Përfaqësuesja e Zvicrës u ka kërkuar futbollistëve të saj me prejardhje shqiptare që të mos festojnë duke bërë me duar shqiponjën dykrenare të flamurit kuqezi. Kreu i Federatës Zvicerane të Futbollit, Marko Von Ah, ka thënë se këto gjeste mund të jenë “problematike”. Po ashtu futbollistëve të përfaqësueses do t’u rifreskohen edhe rregullat e qëndrimit në mediat sociale.

Futbollistët shqiptarë të përfaqësueses së Zvicrës, të cilët kanë spikatur këto javët e fundit me festimet e tyre me shqiponjën dykrenare, duket se i kanë hapur probleme Federatës së Futbollit të këtij vendi, e cila ka vendosur të marrë masa. Duke qenë se futbollistët si Granit Xhaka e Pajtim Kasami, me kryqëzimin e duarve të tyre “kanë bërë shqiponjën” e gjithë përfaqësuesja do të detyrohet të marrë leksione të tipit të “mësimit plotësues” sa i përket sjelljes në fushë, shkruan e përditshmja zvicerane, “Zontag-Xajtung”.

“Në përgatitjet për ndeshjen eliminatore që luhet më 15 nëntor 2014 në St Galen kundër Lituanisë, lojtarëve do t’u jepet leksion për disa forma të sjelljes, perceptimin dhe ndikimin e tyre”, ka thënë për gazetën në fjalë kreu i Federatës Zvicerane të Futbollit, Marko Von Ah. Po ashtu futbollistëve të përfaqësueses do t’u rifreskohen edhe rregullat e qëndrimit në mediet sociale. Ato ndalojnë për shembull fyerjet dhe komentimet emocionale pas ndeshjeve.

Dy rastet më të freskëta që kanë shtyrë zyrtarët e Federatës të marrin këta hapa janë festimi që Granit Xhaka i ka bërë golit të shënuar për Borusian e Mënshengladbahut dhe Pajtim Kasami pasi ka shënuar golin për Olimpiakosit kundër Juventusit. Të dy kanë bërë me duar shqiponjën dykrenare të flamurit shqiptar. Von Ah ka thënë se këto gjeste mund të jenë “problematike”.