ASNN – Do të jetë Flamurtari-Goga Basket finalja e madhe për titull e Kampionatit Kombëtar të Basketbollit për Femra. Ndërkohë që vlonjatet e kishin mbyllur në dy ndeshje duelin gjysmëfinal me Vllazninë, dueli tjetër gjysmëfinal ka shkuar në ndeshjen e tretë dhe skuadra durrsake ka triumfuar ndaj bardhebluve me rezultatin e përgjithshëm 2-1.
Kampionati Kombëtar i Basketbollit për Femra ka njohur edhe finalisten e dytë të këtij sezoni dhe përballë kampiones në fuqi, Flamurtarit, do të jetë skuadra e Goga Basket. Durrsaket e drejtuara nga veterani Astrit Greva dhe ndihmëstrajneri Vladimir Xheka, e kanë fituar takimin e tretë gjysmëfinal me Tiranën, duke triumfuar kështu me rezultatin e përgjithshëm 2-1 në duelin me kryeqytetaset.
Në fakt, ishin vajzat bardheblu, të drejtuara nga trajneri Erdal Borova, që e nisën më mirë ndeshjen, duke e fituar pjesën e parë 21-25. Por vendaset e kanë përmbysur gjithçka, duke i fituar dy pjesët e tjera 30-15 dhe 26-23 dhe duke kryesuar pas gjysmëore lojë me shifrat 77-63. Tirana e fiton pjesën e katërt dhe të fundit 18-17, por në fund është Goga Basket që triumfon me rezultatin e përgjithshëm 94-81 dhe siguron vendin në finale.
Goga Basket – Tirana 94-81
21-25, 30-15, 26-23, 17-18
Goga Basket: Përmeti (9), Turçinoviç (12), Xhanaj (26), Qypi (22), Mehmeti (14) / Memushi (2), Popoviç (7), Dishnica (2). Trajner: A. Greva
Tirana: Gjoni (20). E. Bujari (28), G. Bujari (6), Komti (11), Hoxhaj (14) / Jaçe (2). Trajner: E. Borova
Gjyqtarë: G. Cici, E. Hoxhaj, H. Trajer.
