ASNN – Për dy javë u stërvit ekipi i Pogradecit për ndeshjen e djeshme me Tomorin. Vendësit pësojnë humbjen e parë në këtë sezon, atje ku goli i Papës në minutën e 69-të pati vlerën e tre pikëve për beratasit. Në pjesën e parë është një fillim i shpejtë i vendësve, të cilët rrezikojnë me anën e Topllarit, por në momentin e goditjes finale topi i është rrëmbyer nga mbrojtësit miq. Topi qarkullon më shumë nga vendësit, por mungojnë rastet dhe nga ana tjetër miqtë mbrohen.
Në të 11-n minutë, Bitri me kokë gjuan jashtë, edhe duke qenë brenda në zonën e rreptësisë pogradecare. Pak çaste më vonë, Laçka ishte pranë golit, por Ozuni i miqve kundërpërgjigjet. Tek vendësit vihet re një nxitim para portës mike, ku me pak kujdes mund të shënonin. Tomori preferon kundërsulmin, por sulmuesit e tij zihen në pozicion jashtë loje. Në minutën e 27-të, Laçka në zonë gjuan në drejtim të Vashakut, i cili e pret këtë top. Pak më vonë, Topllari gjuan jo saktë.
Në minutën e 33-të është përsëri Laçka, i cili hyn në zonë, ku mund të shënojë, por ndërhyn saktë një prej mbrojtësve miq. Në të 38-n, Miraka pret një top të lehtë të Ozunit. Ndërkaq, në pjesën e dytë janë miqtë që japin shkëndijën të parët për të vazhduar më vonë vendësit, të cilët kërkojnë të shënojnë duke rrezikuar me anën e Laçkës. Në minutën e 54-t, Arbri ndodhet në zonën e rreptësisë pogradecare, por gabon në gjuajtje.
Shumë shpejt kundërpërgjigjen vendësit, por atyre u mungon qetësia përpara portës kundërshtare. Në minutën e 69-të, është akorduar një goditje dënimi për Tomorin jashtë zonës së rreptësisë pogradecare prej së cilës ka ardhur dhe goli, i cili ka firmën e Papës. Shkunden liqenorët, por e kanë të vështirë të gjejnë golin e barazimit, ndaj dhe Tomori është larguar me tri pikë të arta nga “Gjorgji Kyçyku”.
Pogradeci – Tomori 0-1
Shënues: Papa 69’
Pogradeci: Miraka, Pura, Hysenllari, Pere, Çela, Çerepi (Pengu 46’), Osmani (Shyti 74’), Zguro, Alillari (Zeqollari 79’), Topllari, Laçka. Trajner: A. Abazaj
Tomori: Vashaku, Avdo, Bitri, Ramazani, Dishaj, Kuçi, Uzuni (Shinko 88’), Berberi (Sharavolli 46’), Arbri, Idrizaj (Dervishi 90’). Trajner: E. Memushi
Gjyqtarë: I. Myrtja, M. Dervishi, Gj. Bori (Shkodër)
Kartonë të verdhë: Osmani, Çela / Papa, Avdo, Uzuni, Shinko, Arbri
