ASNN – Pep Guardiola është një trajner fenomenal. Është fakt që ai ka drejtuar vetëm skuadra kampione, por rendimenti i tij si trajner është me të vërtetë befasues dhe i papërsëritshëm. Në fundjavën që lamë pas ai regjistroi fitoren e 400-të në karrierën e tij 10-vjecare si trajner. Dhe këtë shifër e ka arritur në 543 ndeshje që ka drejtuar gjithsej me tri skuadra të ndryshme: Barcelonën, Bajernin e Mynihut dhe Mançester Sitin. Askush nuk ka fituar si ai, sidomos sa i takon trofeve, golave të realizuar dhe shumë statistikave të tjera.
Ai është zbatuesi i përpiktë i lojës “tiki-taka”, por edhe i futbollit total, i atij futbolli që jep spektakël, të bazuar kryesisht në pasimin e shkurtër dhe saktësinë maksimale në veprime. Guardiola erdhi nga të rinjtë e skuadrës së Barcelonës, pasi ishte një vit trajner i Barcelonës B, dhe në vitin 2008 mori drejtimin e skuadrës së madhe “katalane”, për ta bërë atë njërën prej skuadrave më të mira që kishte parë fusha e futbollit ndonjëherë. Në 10 vjet karrierë si trajner, Pep Guardiola ka fituar plot 24 trofe, një shifër kjo e admirueshme.
Më konkretisht ai 3 tituj “kampion” në “La Liga”-n spanjolle, dy Kupa të Mbretit në Spanjë, 3 Superkupa të Spanjës, 3 Superkupa të Evropës, 2 trofe të Ligës së Kampioneve, 3 trofe të Botërorit të Klubeve, 3 tituj “kampion” në Bundesligën gjermane, 2 Kupa të Gjermanisë, 1 titull “kampion” në Premier Ligën Angleze, 1 Kupë Lige në Angli si dhe 1 Superkupë Anglie. Me pak fjalë një trajner i jashtëzakonshëm që fiton gjithçka që i del përpara. Pep Guardiola ka një statistikë tjetër mbresëlënëse, që është pikëaverazhi, ku në çdo ndeshje grumbullon 2.3 pikë.
Kurse skuadra e tij realizon 2.52 gola për ndeshje. Madje këtë sezon në Premier League po shkon drejt një rekordi të ri, sepse mesatarja e golave të shënuar është më shumë se 3 gola për ndeshje. Në 400 fitore të arritura në karrierën e tij deri më tani, 179 fitore i ka me Barcelonën, 124 me Bajernin e Mynihut dhe 97 deri më tani me Mançester Sitin. Këto shifra tregojnë qartë se Guardiola është një prej trajnerëve më të suksesshëm në historinë e futbollit. Kështu si e ka nisur ai pritet të thyejë çdo rekord si trajner, për të qenë i pakrahasueshëm.
Për nga fitoret dhe trofetë, është thuajse i pakapshëm, unikal në llojin e tij. Megjithatë, duhet pranuar se në 543 ndeshje si trajner elitar, ai ka drejtuar tre prej klubeve më të famshme dhe më të mirat e momentit në Evropë.
