ASNN – Pasi ka sjellë të premten ndeshjen midis Kroacisë dhe Italisë dhe të shtunën emocionet e fitores së Kombëtares kuqezi ndaj Francës, Rrjeti i Radio-Televizionit Shqiptar sot do të sjellë për sportdashësit takimin midis Sllovenisë dhe Anglisë.
Kjo ndeshje, e vlefshme për grupin E të Eliminatoreve të “Evropianit 2016”, do të luhet në kryeqytetin slloven, duke nisur në ora 18:00 dhe vë përballë dy skuadrat që mbajnë kreun e renditjes.
Anglezët vijnë si kryesues, pasi kanë korrur 5 fitore në po aq takime, ku kanë shënuar 15 gola dhe kanë pësuar vetëm 1. Ndërsa Sllovenia mban vendin e dytë me 9 pikë, pas 3 fitoresh dhe 2 humbjesh në 5 ndeshje, ku ka shënuar 10 gola dhe ka pësuar 4.
Për këtë arsye, ndeshja e sotme është vendimtare për skuadrën vendase, pasi një humbje do të ndërlikonte çështjen e kualifikimit. Po në kuadër të grupit E, Zvicra viziton Lituaninë, ndërsa San Marino është mysafire në Estoni për t’u ndeshur me vendasit.
