ASNN – Në Stadiumin “Selman Stërmasi” në kryeqytet, Partizani mundi të dielën Teutën me rezultatin 3-0, duke marrë një trepikësh që ka aromë titulli.  Kjo merr vlerë kur mbahet parasysh fakti se Kukësi rival humbi të shtunën në Korçë përballë Skënderbeut dhe diferenca midis dy skuadrave ka shkuar sot në 9 pikë, në favor të të kuqve, të cilët, nëse do të dinë në vijim të menaxhojnë epërsinë e tyre, do të shkojnë të qetë drejt titullit të këtij edicioni.

Sa i përket ndeshjes së sotme me durrsakët, Partizani vuri në fushë zemrën e vet dhe me zgjuarsi dhe këmbëngulje diti të marrë më të mirën. Në fillim shënoi Bruno Telushi, një mesfushor, që në minutën e 5-të dhe u kuptua qartë se për Partizanin e këtij edicioni kanë rëndësi të gjithë repartet dhe se në efikasitetin e skuadrës kontribuojnë edhe mesfushorët e mbrojtësit, sidomos sa i takon realizimit të golave. Pas Telushit, ishte Hila, i cili realizoi me 11-metërsh, në minutën e 32-të.

Ky rezultat e çoi Partizanin në avantazh të të dy golave në dhomat e zhveshjes, një rezultat që i dha qetësinë trajnerit Skënder Gega dhe e mobilizoi atë të mendonte menaxhimin e rezultatit në pjesën e dytë. Dhe 45-minutat e dyta flasin për një Partizan mbrojtës dhe hermetik, që e ka të shenjtë mbrojtjen dhe herë pas here vë në vështirësi Teutën me kundërsulmin. Në minutën e 89-të, ishte Çinari që realizoi golin e tretë për të kuqtë.

Ndërsa për Teutën ishte goli i “nokautit”, sepse e nxori të mundur dhe pa asnjë pikë nga kjo përballje, ndërsa Partizani i Gegës merr tri pikë dhe thellon vendin e parë, pasi me 53 pikë në krye të tabelës ai lë pas Kukësin me 44 pikë, ndërsa Teuta e Durrësit mbetet në vend të tretë me 40 pikë.

Kategoria Superiore

Java e 25-të

Të shtunën:

Skënderbeu – Kukësi          1-0

Të dielën:

Laçi – Flamurtari                   0-0

Kastrioti – Tirana                   1-0

Partizai – Teuta                     3-0

Luftëtari – Kamza                  3-0 (në tavolinë)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        25        16          5          4        29-11              53
2. Kukësi            25        13          5          7        27-16              44
3. Teuta              25        10        10          5        30-22              40
4. Skënderbeu  25        11          4        10        27-23              37
5. Laçi                 25          9        10          6        20-19              37
6. Flamurtari      25          9          8          8        21-19              35
7. Tirana             25          7          8        10        28-26              29
8. Luftëtari         24          7          4        13        20-30              25
9. Kastrioti          25          7          3        15        22-41              24

10.       Kamza            24          4          5        15        13-30              17