ASNN – Java e 6-të e Superligës së Kampionatit Kombëtar të Basketbollit për Meshkuj dhuroi sot emocione të mëdha dhe spektakël, por edhe surpriza. Kryendeshja e kësaj jave, ajo midis Teutës dhe Partizanit, e luajtur në Pallatin e Sportit “Ramazan Njala” të qytetit të Durrësit, rezultoi surpriza më e madhe. Fituan kryeqytetasit me shifrat 78-74, duke marrë një dypikësh me mjaft peshë për renditjen, pasi Partizani e zbriti Teutën nga kryesimi i Superligës pikërisht nga Durrësi.
Mund të përdoren mjaft terma për ndeshjen dhe rezultatin, por dukshëm Partizani e shtangu Teutën sot në Durrës. Rivaliteti ishte shumë i madh dhe ndeshja luhatej gjithë kohës me diferenca mjaft të ngushta. Në fund fituan të kuqtë kryeqytetas që morën një fitore të madhe dhe shfaqen pretendentë për titull këtë edicion. Durrsakët shfaqën shenja lodhjeje në këtë ndeshje, nisur nga takimi i sforcuar që kishin në Ligën Ballkanike ndaj Kozhuvit maqedonas, një lodhje që u ndje në këtë takim.
Por nuk munguan as tensionet në parket në një duel ku publiku i zjarrtë u emocionua së tepërmi, pasi kjo ndeshje i kishte të gjitha. Sa i takon ndeshjes, duhet thënë se Partizani luajti me kartat e tij “sekrete”, që ishin loja befasuese në kundërsulm, përqendrimi në momentet e gjuajtjes për dy e tri pikë, taktikë e spikatur e nervozizmit të kundërshtarit dhe ia doli të kishte sukses. Duhet thënë se në këtë ndeshje spikati për Partizanin Algert Gjonaj, që në minutat e fundit realizoi pikët vendimtare për kryeqytetasit.
Me këtë fitore, Partizani merr kreun e renditjes me 11 pikë, së bashku me Goga Basket, ndërsa Teuta zbret në vend të tretë me 10 pikë.
Kampionati Kombëtar
i Basketbollit – Meshkuj
Superliga
Java e 6-të
Të premten:
Kamza Basket – Tirana 86-82
Të shtunën:
Goga Basket – Vllaznia 131-86
Teuta- Partizani, 74-78
Renditja
Nr. Ekipi N. F. H. Psh-Pp +/- Pikë
- Goga Basket 6 5 1 584-472 99 11
- Partizani 6 5 1 503-423 80 11
- Teuta 6 4 2 538-413 129 10
- Kamza Basket 6 2 4 444-526 -82 8
- Tirana 6 2 4 465-511 -46 8
- Vllaznia 6 0 6 417 603 -186 6
