ASNN – Të premten, duke nisur nga ora 19:00, në Stadiumin “Arena Kombëtare”, do të luhet një nga sfidat më të zjarrta të Kategorisp Superiore të Kampionatit Kombëtar të Futbollit, derbi i kryeqytetit Partizani-Tirana. Të dyja ekipet deri tani kanë zhvilluar një sezon me ulje dhe ngritje, megjithatë derbi mbetet derbi dhe në “Arena Kombëtare” do të luhet për “4-shen Finaler” dhe, mbi të gjitha, për krenarinë e kryeqytetit.
Sipas statistikave, kjo ndeshje pritet të jetë e hapur dhe ofensive pasi do të vihen përballë dy skuadrat që gjuajnë më shumë në portat kundërshtare. Partizani kryeson këtë statisikë, me 12 gjuajtje drejt portës, ndërsa Tirana me 11.4 goditje drejt kuadratit. Një statistikë mjaft interesante, duke marrë në konsideratë që kryesuesit e kampionatit Egnatia godasin në portë mesatarisht më pak se 11 herë për ndeshje.
Dy ekipet kanë statistika mjaft pozitive në fazën sulmues, por nuk janë skuadrat me mbrojtjet më të mira, duke u renditur në vendin e 5-të e të 7-të në kampionat, si ekipet që pësojnë më shumë gjuajtje në portë. Partizani dhe Tirana nuk kanë shumë ekuilibër mes fazës sulmuese dhe asaj mbrojtëse. Në këtë statistikë të kuqtë renditen të 5-tët me 9.74 gjuajtje të pësuara drejt portës, ndërsa bardheblutë të 7-tët me më shumë se 11 goditje të pësuara.
Skuadra më e mirë në këtë statistikë është Vllaznia me vetëm 8.81, ndërsa Egnatia e dyta me 9.13. Ajo që vihet re është se Tirana, pavarësisht goditjeve të marra drejt portës, është një skuadër që pëson pak. Nëse ka një gjë të vështirë për t’u parashikuar të premten në derbin e kryqytetit është se kush skuadër do të ketë përqindjen më të lartë të mbajtjes së topit.
Kjo pasi deri më tani Partizani, Tirana por edhe Egnatia janë skuadrat që dominojnë në këtë statistikë me një mesatare të mbajtjes së topit më shumë se gjysmën e ndeshjes. Duke lexuar këto statistika, Tirana si grup mund të jetë fituesja e derbit, ndërsa Partizani mund ta arrijë triumfin përmes dallimit që mund të bëjnë lojtarë të ndryshëm. Sidoqoftë, skuadrat cilësisht janë të përafërta dhe ia vlen ta blesh një biletë për ta ndjekur derbin e së premtes në “Arenën Kombëtare”.
