ASNN – Java e 13-të e Kategorisë Superiore luajti sot 4 takime që dhuruan emocione të forta por edhe surpriza. Natyrisht, surpriza më e madhe ishte pasdite fitorja e thellë 3-0 e Kastriotit përballë Kamzës. Një fitore me vlera dhe me përmbysje 2-1 arriti dhe Luftëtari ndaj Tiranës, një fitore ndaj rivalit direkt për vendin e 7-të, por mbi të gjitha, këtë të diel pasdite spikatën fitoret e dy skuadrave kryesuese, Partizanit dhe Skënderbeut, që triumfuan me të njëjtin rezultat, 1-0, përkatësisht ndaj Laçit dhe Flamurtarit.

Kështu, në kryeqytet Partizani mposhti me vështirësi Laçin me një gol të shënuar nga i riu Jurgen Bardhi në minutën e 62-të. Është në vazhdën e fitoreve të Partizanit këtë sezon, fitore të ngushta, por me lojë të qëndrueshme dhe kjo merr vlerë sidomos kur mendohet se suksesi trepikësh erdhi ndaj “maces së zezë” të Superiores, Laçit. Kurbinasit bënë një ndeshje të mirë, por nuk kishin aftësinë e dy javëve të shkuara që korrën sukses të rëndësishëm. Por këtë herë kishin përballë një skuadër të konsoliduar, që ka reparte harmonike.

Por edhe një strategji mjaft efikase të lojës së fortë fizike dhe taktikës së kontrollit të lojës së vet e të kundërshtarit, sipas projektit të trajnerit Skënder Gega. Kurse për Migen Memellin ishte disfata e parë si trajner në Superiore. Ndërkohë, në Korçë, Skënderbeu mori 3 pikë të vyera ndaj Flamurtarit, duke ruajtur ritmin me Partizanin kryesues. Goli erdhi në minutën e 89-të, nga i përhershmi Dejvi Bregu. Ky gol e nderoi skuadrën e Orges Shehit, që u ngjit në kuotën e 29 pikëve, dy më pak se Partizani i vendit të parë që ka 31 pikë.

Ish-trajneri Ilir Daja, doli i humbur nga Korça prej ish-skuadrës së tij, duke bërë që Flamurtari të mbetet në kuotën e 19 pikëve. Të hënën pasdite do të luhet një tjetër duel i rëndësishëm, pikërisht në kryeqytet, midis Kukësit dhe Teutës, një duel që bëhet për vendin e tretë.

Kampionati Kombëtar i Futbollit

Kategoria Superiore

Java e 13-të:

Të dielën:

Luftëtari – Tirana                   2-1

Kastrioti – Kamza                  3-0

Skënderbeu – Flamurtari    1-0

Partizani – Laçi                     1-0

Të hënën:

Kukësi – Teuta                      (14:00)

Renditja

Nr.       Skuadra         Pikë

1. Partizani        31
2. Skënderbeu  29
3. Laçi                 22
4. Teuta              21
5. Kukësi            20
6. Flamurtari      19
7. Luftëtari         13
8. Tirana             10
9. Kamza              8
10. Kastrioti   7