Partizani duket e nuk po e çon dëm sezonin, pasi i mjafton dhe një fitore në këtë javë të fundit të kampionatit port të siguruar pjesëmarrjen në Ligën e Evropës si vend i dytë ose i tretë në klasifikim. Optimizmi në radhët e skuadrës së kuqe është maksimal, por ka dhe pasiguri, që lidhen me lëvizjet e mundshme në merkato dhe emrat e parë kanë nisur të diskutohen. Një ndër elementët e rëndësishëm të “Demave të kuq”, portieri Alban Hoxha, pranoi dje se ka oferta nga klube të huaja, por edhe nga kampionati vendas, por nuk ka vendosur ende.
Megjithatë, ai la të hapur çdo mundësi, përfshi edhe atë të qëndrimit në kampionatin shqiptar, por duke deklaruar se në Kategorinë Superiore do të luajë vetëm me Partizanin dhe jo me skuadër tjetër. Sipas burimeve pranë futbollistit bëhet fjalë për oferta që vijnë nga kampionati italian, por vetë Hoxha nuk ka dashur të nxitohet. Alban Hoxha po mbyll një sezon fantastik me Partizanin në aspektin personal. Pavarësisht se të kuqtë nuk arritën të fitonin asnjë trofe, thyerja e rekordit të Bujar Gogunjës me 1084 minuta pa pësuar gol, si grumbullimi në kombëtare nga trajneri Xhovani De Biazi, e bëjnë sezonin e 27-vjeçarit tepër të suksesshëm.
Kontrata e tij me Partizanit përfundon me mbylljen e kampionatit, por për shkak të një dëmtimi, që nuk e lejon të aktivizohet me Elbasanin, Hoxha mund të mos e veshë më fanellën e kuqe. Pavarësisht mungesës së titullit, pjesëmarrja në Ligën e Evropës, sipas Hoxhës, bën që sezoni i 15 herë kampionëve të Shqipërisë të mos quhet i dështuar. “Për mua ka qenë një sezon shumë i suksesshëm, – ka deklaruar ai. – Theva rekordin e minutave pa pësuar gol si dhe u grumbullova në Kombëtare. E nisëm sezonin me objektiva madhorë dhe për disa gabime të vogla, nuk mundën ta fitonim titullin.”
“Sidoqoftë, pjesëmarrja në Evropë e bën të suksesshëm sezonin e Partizanit”, – tha Hoxha. Por cila do të jetë e ardhmja e portierit të Partizanit? Mësohet se për shërbimet e tij ka patur oferta nga Kroacia dhe Austria, por vetë portieri i Partizanit nuk flet me emra konkretë. “Të them të drejtën kam patur oferta, por nuk mund të flas më shumë se nuk janë konkrete. Menaxheri im është në fazën e bisedimeve dhe do të bëjë zgjedhjen më të mirë të mundshme”, – shtoi portieri i të kuqve kryeqytetas. Një gardian i spikatur në Superiore dhe me kontratë drejt skadimit, nuk mund t’i shpëtojë interesimit të klubeve të tjera elitare shqiptare.
“Edhe në Shqipëri janë dy klube të rëndësishme që më kërkojnë, por për mua zgjedhja e parë mbetet Partizanit”, – përfundoi Hoxha, duke mos dhënë emra skuadrash konkrete por gazetarët kanë zbuluar se bëhet fjalë për oferta që vijnë nga klubet italiane. Nuk dihet se çfarë roli ka në lëvizjen e tij trajneri i Kombëtares Xhovani De Biazi, i cili i nxit lojtarët e përfaqësueses të zgjedhin ekipe italiane për shkak të epërsisë taktike që ka futbolli i këtij vendi, por edhe cilësisë futbollistike në tërësi.
