ASNN – Partizani luajti të dielën duelin derbi me Kamzën në fushën e kësaj të fundit, duke fituar me rezultatin 1-0. Ishte një ndeshje e vaktë në të gjitha drejtimet, ndoshta dhe për faktin se të kuqtë nuk kishin përballë një skuadër cilësore sic ndodhi javën e kaluar kur fituan në Korçë ndaj Skënderbeut. Megjithatë, edhe në këtë ndeshje u shënua një gol me vlerë 3 pikësh, sepse të kuqtë shkëputen dhe një herë në kryesim, me 5 pikë nga Kukësi i vendit të dytë.

Në fakt, deshja nuk ishte aspak e bukur dhe është fakt që Partizani i këtij sezoni nuk luan bukur, por ai ka të qarta idetë e lojës, është racional në veprime, shënon atëherë kur duhet dhe e ndihmon të mbajë qëndrueshmëri në lojë e rezultat mbrojtja e tij hermetike, që nuk u jep asnjë shans skuadrave rivale. Pjesa e parë pati më shumë rivalitet në mesfushë, ku të dyja skuadrat gjurmonin njëra-tjetrën pa krijuar ndonjë episode për t’u përmendur.

Kamza mbrohej me kujdes dhe Partizani qarkullonte dendur topin për të gjetur hapësirën ku tentohej goli. Diferenca në takimin e sotëm erdhi në minutën e 65-të, kur Jasir Asani, “njeriu-gol” i Partizanit në këtë sezon, arriti më në fund të gjejë rrjetën pas një aksioni të gërshetuar bukur nga “demat”. Ky gol çliroi psikologjikisht ekipin e Skënder Gegës që nisi të mendojë për administrimin e epërsisë. E ndërsa Kamza doli para të kërkojë golin e barazimit, Partizani mendojë ta “lerë me kaq”.

Për të marrë një 3-pikësh që i mjaftonte në rrugëtimin e tij në krye të garës. Dhe llogaritë e trajnerit Gega rezultojnë pozitive, sepse me dy gola gjithsej në dy ndeshje, Partizani ka grumbulluar 6 pikë, duke ruajtur dhe thelluar distancën me ndjekësit që janë Kukësi dhe Teuta,  ku, në 2 ndeshje, verilindorët kanë marrë 4 pikë, ndërsa bregdetarët, vetëm 2. Pra llogaritë e Gegës janë për titull, pavarësisht se Partizani nuk ka bërë goditje në merkato në nivelin e  dy rivalëve të tij.

Skema e tij taktike e lojës mbrojtje-mbrojtje-kundërsulm duket se po jep më shumë efikasitet se taktika që kanë ndjekur rivalët. Pas fitores së radhës, Partizani ngjitet në kuotën e 43 pikëve, 5 pikë më shumë se Kukësi i vendit të dytë që ka 38 pikë dhe 8 pikë më shumë se Teuta e vendit të tretë që ka 35 pikë. Ekipet e tjera ndjekëse, domethënë Laçi, Skënderbeu e Flamurtari, kanë përkatësisht 12, 13 dhe 14 pikë më pak se kryesuesit e kuq.

Pas kësaj jave mund të konstatohet se tre rivalët për titull do të jenë Partizani, Kukësi dhe Teuta, por kjo e fundit disi e shkëputur.

Kategoria Superiore

Java e 20-të

Të premten, 1 shkurt 2019:

Tirana – Teuta                       1-1

Të shtunën, 2 shkurt 2019:

Kastrioti – Skënderbeu        2-1

Kukësi – Flamurtari              1-2

Të dielën, 3 shkurt 2019:

Laçi – Luftëtari                       0-2

Kamza – Partizani                0-1

Renditja

Nr. Skuadra               Pikë

1. Partizani 43
2. Kukësi 38
3. Teuta 35
4. Laçi 31
5. Skënderbeu 30
6. Flamurtari 29
7. Tirana 21
8. Luftëtari 20
9. Kastrioti 16
10. Kamza 15