ASNN – Partizani pret të shtunën në kryeqytet Apoloninë, në takimin e vlefshëm për javën e 29-të të Kategorisë Superiore dhe, duke folur për këtë sfidë, trajneri i të kuqve kryeqytetas, Shpëtim Duro, kërkoi që të mos nënvlerësohet kundërshtari. Për trajnerin e Partizanit, fati i titullit “kampion” do të vendoset brenda këtij muaji.
Pasi e uroi Kombëtaren kuqezi, gjatë konferencës për shtyp të dhënë të enjten, për suksesin e arritur ndaj Armenisë, trajneri 55-vjeçar u përqendrua te forma e ekipit të tij, duke e pranuar se pushimi i imponuar nga ndeshjet eliminatore ka ndikuar pjesërisht te skuadra e tij, ku disa lojtarë nuk gëzojnë formën optimale.
Skuadra e Partizanit ndeshet të shtunën pasdite me Apoloninë, në një takim ku të kuqtë e trajnerit Shpëtim Duro do të kërkojnë vetëm fitoren. Këtë e ka theksuar edhe vetë kreu i stolit të Partizanit. ‘Apolonia edhe pse është shumë pranë rënies nga kategoria mbetet një kundërshtar që duhet vlerësuar maksimalisht”, – ka thënë ai.
“Ata janë një skuadër që luajnë pa shumë presion dhe kanë elementë të mirë në organikën e tyre”, – ka shtuar ai. Pas përballjes, në letër, të lehtë me Apoloninë, Partizani do të luajë dy sfida direkte për titullin, fillimisht kundër Skënderbeut dhe më pas kundër Kukësit.
Për trajnerin e Partizanit, fati i titullit “kampion” do të vendoset brenda këtij muaji. Në vijim, trajneri i të kuqve shtoi se fakti që tre rivalët e tjerë do të luajnë edhe në Kupë nuk e favorizon ekipin e tij. Ai ritheksoi gjithashtu besimin që ka te qendërsulmuesi Stevan Raçiç duke theksuar se lojtari serb i ka plotësuar të gjitha pritshmëritë.
Duro kritikoi zërat që e konsiderojnë një trajner mbrojtës, duke u shprehur se objektivi i tij i vetëm është fitorja. Partizani mban vendin e 3-të të renditjes, me 56 pikë, ndërsa Apolonia renditet e parafundit, me 16 pikë. Kategoria Superiore rinis nga java e 29-të, me 4 skuadrat pretendente në garë për trofeun final.
4 ndeshje të kalueshme në letër për rivalët të cilët më pas do të nisin një tur force me përballje direkte. Mes tyre qëndron edhe Partizani që nga vendi i tretë do të kërkojë të sigurojë suksesin e katërt radhazi këtë të shtunë në Stadiumin Kombëtar “Qemal Stafa” kundër Apolonisë.
