ASNN – Përkundër të gjitha gjasave, Partizani ka mbajtur gjallë shpresat, deri më sot, mjaft të vakëta për titull, pasi ka fituar me një gol të vetëm në Korçë ndaj Skënderbeut vendas, duke bërë që gjithçka të vendoset në javën e fundit të këtij sezoni. Takimi midis kampionëve në fuqi dhe sfidantëve për titull, u vendos në minutën e fundit të kohës së rregullt, nga një gol i Vilës, dhe tashmë Skënderbeun dhe Partizanin i ndajë vetëm 2 pikë nga njëra-tjetra në krye.
Niveli më i lartë i Kampionatit Kombëtar të Futbollit, që njihet si Kategoria Superiore e ka shtyrë edhe për 4 ditë të tjera kurorëzimin e kampiones e re të këtij sezoni. Kjo sepse takimi i parë i javës së 35-të, ai që u luajt të premten në mbrëmje në Korçë midis Skënderbeut vendas dhe Partizanit, pasi kryeqytetasit kanë fituar me rezultatin 1-0, duke bërë që fati i titullit të mos vendosej në këtë ndeshje.
Pjesa e parë e këtij takimi ka qenë kryesisht e vakët, me një lojë që nuk u ngrit dot mbi nivelin mesatar, me të dyja skuadrat më të kujdesshme të mos pësojnë gol. Për këtë arsye, 45-minutëshi i parë është mbyllur me rrjeta të paprekura. Në pjesën e dytë, Partizani ka rrezikuar që në fillim portën e gardianit të korçarëve, Shehi, i cili u është falur të dyja shtyllave për të shpëtuar nga goli.
Në përgjithësi, pjesa e dytë ka qenë më e luftuar dhe më e bukur, me të dyja skuadrat në kërkim të golit. Teksa minutat kalonin dhe i afroheshin fundit dhe me Skënderbeun që i mjaftonte edhe një barazim për t’u kurorëzuar edhe matematikisht “kampion” për të 6-ën herë radhazi dhe për të 7-ën herë në histori, në Korçë po bëhej gati për festën e madhe.
Por, Partizani, të cilit i bënte punë vetëm fitorja, për të shpresuar në një mrekulli në javën e fundit, e ka gjetur golin pikërisht në minutën e fundit të kohës së rregullt, duke i prishur festën vendasve. Takimet e tjera të javës së 35-të të Kategorisë Superiore luhen të shtunën, duke nisur nga ora 17:00 dhe Rrjeti i Radio-Televizionit Shqiptar, do të sjellë për sportdashësit takimin Bylis-Flamurtari.
