ASNN – Sportistja e radhës që ka konkurruar për Shqipërinë në Lojërat Olimpike Rinore, që po mbahen në Buenos Aires ka qenë atletja Relaksa Dauti, e cila ka marrë pjesë në fazën e parë të garës së 800 metrave. 17-vjeçarja ka garuar në baterinë e parë, por ia ka dalë në fund të renditet e 18-ta në përfundim të 3 baterive, duke lënë prapa 8 atlete të tjera.
Vazhdon konkurrimi i Shqipërisë në Lojërat Olimpike Rinore, që po mbahen në kryeqytetin e Argjentinës dhe sportistja e radhës ka qenë atletja Relaksa Dauti, e cila ka marrë pjesë në fazën e parë të garës së 800 metrave. Sportistja 17-vjeçare ka garuar në baterinë e parë, duke u renditur e parafundit, me kohën 2 minuta, 16 sekonda e 98 të qindtat.
Megjithatë ajo ia ka dalë të renditet e 18-ta në përfundim të 3 baterive, duke lënë prapa 8 atlete të tjera. Rezultati i saj në këtë bateri ishte 4 sekonda prapa kohës së saj më të mirë në këtë garë, por burime nga delegacioni olimpik kuqezi në Buenos Aires, kanë theksuar në këtë rezultat ka ndikuar edhe temperatura e ulët, prej 12 gradësh, që është regjistruar në mbrëmje në kryeqytetin argjentinas.
Sidoqoftë, atletja e re shqiptare do të ketë edhe një shans tjetër në fazën e dytë, ku 8 kohët më të shpejta do të konkurrojnë në baterinë e 3-të, që, edhe pse nuk quhet e tillë, është praktikisht një finale. Dauti do të garojnë në një nga dy bateritë e tjera, ku ka mundësi të luftojë për një kohë më të mirë.
