Vlerësohet kontributi i të gjithë atyre që bënë historinë e sportit të ujit në Shqipëri, ndërsa janë shpërndarë 18 Mirënjohje për figurat e tij. Premtohet pishina olimpike. “Jam shumë i lumtur që jemi të gjithë së bashku në këtë 85-vjetor të Federatës Shqiptare të Notit. Mbi të gjitha ju falënderoj për atë që keni bërë”.
Kështu e ka nisur përshëndetjen e tij presidenti i Federatës Shqiptare të Notit, Agim Çiraku, i cili ka bërë dhe një farë historie të notit në vendin tonë. Sipas tij garat e para janë të regjistruar në Molin e Durrësit më 23 gusht 1931. “Nga 1931 deri më 1937 garat janë bërë një Durrës që personifikohen me një figurë si Taq Dafa”, – ka thënë ai.
“Nëse 1939-1944 ka qenë një periudhë e vështirë për të gjithë, nga 1945-1990 noti ka pasur një zhvillim të madh me 17 pishina në të gjithë vendin, si dhe me figura si Meriban Kadiu, Koço Afezolli, etj, – ka vijuar kreu i notit shqiptar. – Pas viteve ‘90, Federata Shqiptare e Notit ka qenë në vështirësi për t’u ringjallur më 1996-ën.”
“E që prej kësaj kohe me kontributin e të gjithë presidentëve noti është në rrugë të mbarë, – ka theksuar Çiraku. – Mos harroni kemi për herë të parë një gjyqtar ndërkombëtar dhe një anëtar në komisionin teknik të apelimit në Federatën Evropiane të Notit.”
“Pa thënë që marrëdhëniet e mira me homologët Evropian, mbi të gjitha ato të Italisë, japin kontributet e tyre. Në një bashkëpunim të mirë me Bashkinë e Durrësit kemi ndërtuar pishinën 25-metërshe dhe 50 metërshe dhe vazhdojmë marrëdhëniet e mira me Ministrinë e Arsimit dhe Sportit”, – ka përfunduar presidenti i FSHN-së.
