ASNN – Juventusi, Bazeli dhe Monako janë ekipet që janë kualifikuar pas ndeshjeve të ditës martë, ndërsa janë përcaktuar kështu 14 nga 16 skuadrat e para që kualifikohen për në turin e 16-shes së Ligës së Kampioneve. Eliminohet Liverpuli, që tashmë do të luajë në Ligën e Evropës, ndërsa sot përcaktohen edhe 2 skuadrat e tjera që vazhdojnë ëndrrën e tyre në veprimtarinë më prestigjioze të klubeve të kontinentit.
Juventusi ka barazuar 0-0 me Atletikon e Madridit dhe të dyja skuadrat kalojnë në turin tjetër të Ligës së Kampioneve. Një ndeshje e mërzitshme që nuk dhuroi asnjë emocion për të sportdashësit. Olimpiakos ka mundur 4-2 Malmoen, duke siguruar kështu një vend në Ligën e Evropës. Ky ka qenë edhe takimi me më shumë gola i mbrëmjes së parafundit të fazës së grupeve.
Në grupin B, Liverpuli ka barazuar 1-1 me Bazelin por nuk arrin të kualifikohet për më tej në Ligën e Kampioneve. Të parët kalojnë në epërsi miqtë me anë të Freit dhe më pas barazon kapiteni i të kuqve, Stivën Xherard. Në këtë sfidë kanë shkëlqyer dy futbollistët e kombëtares shqiptare, Xhaka dhe Gashi. Në sfidën tjetër të mbrëmjes, Reali i Madridit ka mundur 4-0 Ludogorets Razgradin.
Madrilenë e mbyllin kështu me pikë të plota, 18. Ndërkaq, Zeniti i Shç Peterburgut është eliminuar nga Liga e Kampioneve, pasi në ndeshjen e fundit të grupit C është mundur 2-0 nga Monako, e cila vijon më tej. Ndërsa ndeshja tjetër ajo midis Benfikës dhe Bajer Leverkusenit është mbyllur në barazim pa gola 0-0. Dy skuadrat e kualifikuara të këtij grupi janë Monako dhe Bajer Leverkusen.
Në grupin D, Borusias së Dortmundit i ka mjaftuar një barazim 1-1 me Anderlehtin për të qenë kryesuese e këtij grupi. Ndërsa në sfidën tjetër, Gallatasaraj është mundur 4-1 nga Arsenali. Edhe anglezët kualifikohen për më tej në Ligën e Kampioneve, por si e dyta e grupit. Sonte përcaktohen edhe 2 skuadrat e tjera që kanë mbetur për t’u njohur për në turin e 16-shes së kësaj veprimtarie.
