ASNN – Dinamo, fitore në “frymën e fundit”. Shpërdoron dy gola epërsi, por i falet golit të kapitenit Hoxha për fitoren 3-2 ndaj Kukësit. Me dy takimet e zhvilluara të hënën, niveli më i lartë i Kampionatit Kombëtar të Futbollit, Kategoria Superiore, ka mbyllur javën e saj të 21-të. Në ndeshjen e luajtur në mbrëmje në Stadiumin “Niko Dovana” të Durrësit, Dinamo dhe Kukësi kanë zhvilluar një përballje me dy tablo, që mbyllet me një gol në favor të të kaltërve në minutën e 6-të shtesë.
Në fakt, pjesa e parë ka folur për skuadrën e trajnerit Dritan Mehmeti, e cila e ka gjetur golin e parë në minutën e 11-të, kur Denisoni merr bukur një top dhe pason për Lorenco Vilën, i cili me portën e boshatisur nuk gabon. Pa u mbushur ende 60 sekonda lojë, Dinamo e ka dyfishuar epërsinë, pasi Denisoni përfiton nga një gabim në mbrojtjen e verilindorëve dhe ruan gjakftohtësinë, duke çuar topin në rrjetë.
Përtej një pretendimi në minutën e 23-të, kur futbollistët e Kukësit kërkuan kartonin e dytë të verdhë për Gudjabinë, pas një faulli ndaj Salamisë, por gjyqtari bën shenjë vetëm për goditje të lirë, pjesa e parë nuk do të sjellë më gola të tjerë. Kështu, pjesa e parë mbyllet me epërsinë e dyfishtë të Dinamos, por e dyta shikon Kukësin më këmbëngulës dhe kjo këmbëngulje do të konkretizohet në minutën e 84-t, kur Rivas goditi fort diagonalisht brenda zonës dhe mposhti portierin Sali.
Pa u mbushur 120 sekonda lojë, Kukësi ka barazuar shifrat, pasi Vasil Zhongo kthen me kokë në rrjetë një top i ardhur nga goditja e këndit. Megjithatë, në fundin e 6 minutave shtesë, një goditje e lirë e Dinamos do të shohë kapitenin Rustem Hoxha të fitojë duelin ajror me portierin Tafas dhe ta përcjellë topin në rrjetë, duke vulosur kështu fitoren 3-2 ndaj Kukësit.
Dinamo ngjitet në vendin e 6-të, në kuotën e 25 pikëve, po aq sa ka edhe Skënderbeu, me të dyja skuadrat që kanë luajtur nga një ndeshje më pak, atë të shtyrën midis tyre. Ndërsa Kukësi mbetet në vendin e parafundit, me 19 pikë, dy më tepër sesa Teuta e vendit të fundit.
