Volejbolli i meshkujve, në prag të javës së fundit të fazës së tretë të kampionatit, e cila do të luhet të shtunën, ka luajtur ndeshjet e prapambetura të saj. Kështu Studenti ka fituar pastër 3-0 në Korçë dhe e ka mbyllur ciklin e ndeshjeve të fazave vajtje-ardhje, ndërsa është në pritje të “play-off”-it. 15-25, 9-25 dhe 20-25 kanë qenë setet e fituara nga lojtarët e trajnerit Ylli Tomori. Ajo që nuk kuptohet është fakti se pse Vllaznia-Farka Volej është luajtur në Durrës, ndërsa në fakt duhet të ishte zhvilluar në Pallatin e Sportit “Qazim Dervishi” të Shkodrës.

Megjithatë ka qenë një ndeshje shumë e luftuar, atje ku për të përcaktuar fituesen janë kërkuar pesë sete. Pas së cilës është shpallur fituese Vllaznia, e cila kështu është pjesë e “play-off”-it për titull “kampion”. Edhe pse Farka Volej ka fituar dy setet e para, 25-22 dhe 25-21, sërish shkodranët kanë reaguar, teksa kanë marrë 3 sete radhazi (20-25, 17-25, 14-16). Dhe në fund ka dalë fituese Vllaznia e Artan Kalasë. Federata Shqiptare e Volejbollit, ndërsa për meshkuj dhe për femra ka dhe një javë, ka përcaktuar formulën e këtij “play-off”-i, që është me skemën 1-4 dhe 2-3.

Por jo vetëm kaq ka përcaktuar dhe datat e ndeshjeve. Për meshkuj, teksa fituesja përcaktohet me dy ndeshje të fituara, nga 3 të mundshme, do të luhet më 1 prill, 4 prill dhe 8 prill 2015 nëse do të jetë e nevojshme. Për femra luhet më 2 prill, 5 prill dhe 9 prill 2015, nëse do të jetë e nevojshme. Më pas, finalet, si për meshkuj, ashtu dhe për femra, ndonëse mund të ketë ndonjë lëvizje, do të luhen më 11 prill, 14 prill, 17 prill, 21 prill dhe 24 prill (këto të dyja nëse do të jetë e nevojshme, sepse kampionia caktohet me tre ndeshje të fituara).

Kampionet në fuqi të volejbollit shqiptar janë Barleti Volej për femra dhe Studenti për meshkuj. Dhe tashmë javët e fundit janë vetëm sa për të “çimentuar” skuadrat në renditje, sepse katërshet thuajse janë të zyrtarizuara.

Kampionati Kombëtar

i Volejbollit – Meshkuj

Të prapambetura

(24 mars 2015)

Skënderbeu – Studenti                  0-3

Vllaznia – Farka Volej                     3-2

Renditja

Nr.       Skuadra         N.        F.         H.        Setet               Pikë

1. Studenti 18        16        2        51-14              48
2. Tirana 17        15        2        46-20              42
3. Teuta 17        9        8        34-29              29
4. Vllaznia 17        9        8        34-29              27
5. Farka Volej 17        8        9        30-31              23
6. Elbasani 17        2        15        12-48              6
7. Skënderbeu 17        1        16        14-50              5