Kategoria e Parë në “Facebook” shpall 11-shin më të mirë të vitit. Por a mund të cilësohet real ky votim, kur ka dhe skuadra të tjera më të mira se këto të dyja? Faqja në “Facebook”, Kategoria e Parë, ka hapur një sondazh ditët e fundit për tifozët, të cilët duhet të votonin formacionin më të mirë të vitit. Dhe ai është me skemën taktike 4-4-2: Gjokoviç (Tërbuni) – Danaj (Tërbuni), Bello (Sopoti), Kelmendi (Sopoti), Mone (Tërbuni) – Lezi (Sopoti), Cake (Sopoti), Kastrati (Sopoti), Mziu (Tërbuni) – Polisi (Sopoti), Malo (Besëlidhja). Dhe pyetja që lind në këto raste, a është realisht ky formacioni më i mirë i Kategorisë së Parë për pjesën e parë të sezonit?

Në një kampionat që ka 20 skuadra, të ndara në Veri e Jug, por që më së shumti 7 prej tyre janë pretendente për t’u ngjitur në Kategorinë Superiore, nuk është reale një dominim i Tërbunit dhe i Sopotit në këtë 11-tësh. Nëse lojtarët e skuadrës pukjane, edhe duke qenë kryesues të grupit të Veriut në Kategorinë e Parë, e meritojnë një gjë të tillë, formacioni i Sopotit, edhe me atë paraqitje jo fort bindës që bëri më 20 dhjetor ndaj Dinamos në “Selman Stërmasi” nuk është se mund të kishte kaq shumë lojtarë në këtë formacion. Nga komentet e votuesve në faqen e facebookut të Kategorisë së Parë, mungojnë Fonseka, që ka shënuar 9 gola, si dhe Karapici i Mamurrasit.

Pa harruar portierin e Lushnjës, Mikel Spahon, apo kapitenin e Butrintit, Muço. Po pse jo mund të ishte dhe Turdiu e Imami të Dinamos si shënuesit më të mirë të bluve në 12 javë kampionati me nga katër gola secili. Apo dhe Jasmin Raboshta i Butrintit, i cili me 17 gola në të gjithë vitin 2014 është i dyti pas Pero Pejiçit të Kukësit, sipas një studimi që ka bërë gazetari sportiv shqiptar, i cili jeton në Shtetet e Bashkuara të Amerikës, Enver Tonuzi. E thënë ndryshe, përtej përpjekjeve të faqes në “Facebook” të Kategoria e Parë, ky 11-tësh nuk mund të jetë, sepse është më tepër subjektiv, se sa objektiv.

Gjithsesi Kategoria e Parë ka dhe 16 javë për të përfunduar sezonin e saj, ndërsa Tërbuni e Lushnja janë kryesues me meritë në përfundim të pjesës së parë të sezonit në Veri dhe në Jug.