ASNN – Më 31 gusht mbyllen licencimet, më pas do të rrotullohen goglat. Sezoni i ri nis më 14 shtator 2019. Kategoria e Parë nis më 14 shtator, por duhet pritur fillimisht deri më 1 shtator, për të parë nëse të gjitha klubet i kanë plotësuar kushtet e licencimeve. Vetëm pasi të jenë konfirmuar skuadrat dhe të jenë përmbushur kushtet e licencimeve, pritet të hidhet edhe shorti i sezonit të ri. Siç dihet, edhe sezoni i ardhshëm i Kategorisë së Parë të Kampionatit Kombëtar të Futbollit do të sillet për sportdashësit drejtpërdrejt nga Rrjeti i Radio-Televizionit Shqiptar.
Thuajse dy javë na ndajnë nga nisja e sezonit të ri dhe niveli i dytë i Kampionatit Kombëtar të Futbollit, Kategoria e Parë, dalëngadalë po merr trajtë. Në fakt, ai nis më 14 shtator, por duhet pritur fillimisht deri më 1 shtator, për të parë nëse të gjitha klubet i kanë plotësuar kushtet e licencimeve. Burime zyrtare të Federatës Shqiptare të Futbollit kanë sqaruar për RTSH Sport, se vetëm pas skadimit të afatit të fundit, që është 31 gushti, do të konfirmohet skuadrat pjesëmarrëse, që paraprakisht janë 20, të ndara në dy grupe, grupin e Veriut dhe atë të Jugut.
Vetëm pasi të jenë konfirmuar skuadrat dhe të jenë përmbushur kushtet e licencimeve, pritet të hidhet edhe shorti i sezonit të ri. Nëse nuk hidhet brenda javës së ardhshme, ai duhet të hidhet patjetër të hënën e 9 shtatorit, që është edhe afati i fundit. Në grupi A, apo grupin e Veriut, Kastrioti i rënë nga Superiorja, Besëlidhja, por edhe Erzeni dhe Dinamo janë midis favoriteve, ndërsa në grupin B, apo grupin e Jugut, Apolonia e Lushnja, por edhe Oriku dhe Devolli, vijnë me synime madhore.
Siç dihet, vendi i dytë i çdo grupi të Kategorisë së Parë do të ketë mundësi të shpresojë për ngjitjen në Kategorinë Superiore, falë formulës së re, të miratuar së fundmi. Kjo pritet që ta rrisë nivelin e konkurrencës dhe, në grupin A, apo grupin e Veriut, favoritet për biletën shtesë për Superiore pritet të shtohen. Sezoni i ri i Kategorisë së Parë do të fillojë më 14 shtator 2019 dhe do të përfundojë më 16 maj 2020. Sikundër ka ndodhur gjatë sezoneve të fundit, edhe sezoni i ardhshëm i Kategorisë së Parë të Kampionatit Kombëtar të Futbollit do të sillet për sportdashësit drejtpërdrejt nga Rrjeti i Radio-Televizionit Shqiptar.
