ASNN – Shoqata e Minifutbollit Shqiptar ka vendosur të nderojë Alfred Ziajin, krijuesin dhe ish-president i kësaj shoqate me një turne, i cili do të mbajë emrin e tij. Këtë fundjavë në pallatin e sportit “Flamurtari” në Vlorë, 8 ekipe po konkurrojnë për të marrë trofeun.

Një nga figurat e shquara të futbollit vlonjat, Alfred Ziaj, do të përkujtohet me një trofe të veçantë. Me organizim të Shoqatës së Minifutbollit Shqiptar, 8 ekipe, e më konkretisht Tirana, Titans, KS “Ali Demi”, Teuta, Birra “Kaon”, Vllaznia, Edra Vlora dhe Flamurtari po garojnë në Vlore për Kupën “Alfred Ziaj”.

Presidenti i Shoqatës së Minifutbollit Shqiptar, Klodian Kadiu, është shprehur se ky turne do të jetë i përvitshëm dhe bëhet në nder të kësaj figure të shquar të futbollit shqiptar. “Pa Alfred Ziajin nuk do të ekzistonte as futbolli i sallës, sepse ishte përkushtimi i tij që e mbajti gjallë këtë sport”, – tha ai.

Të shtunën janë zhvilluar ndeshjet me sistem eliminimi, ndërmjet skuadrave e pjesëmarrëse, ndërsa të dielën do të luhet gjysmëfinalet dhe finalja e Turneut të Minifutbollit “Alfred Ziaji”. Bashkë me këtë turne janë planifikuar edhe veprimtari të tjera në nderim të kësaj figure të futbollit vlonjat dhe të minifutbollit.