ASNN – Jusein Bolt: Kam marrë oferta nga shumë klube, por edhe mund të tërhiqem, vendos në fund të nëntorit. Fituesi i 8 medaljeve të arta olimpike dhe njëherësh mbajtësi i rekordit botëror në sprintin e 100 dhe 200 metrave, Jusein Bolt, ende shpreson që të nënshkruajë kontratë si futbollist profesionist me ndonjë klub të njohur, por për momentin një marrëveshje e tillë ende nuk ka ardhur.

Gjithsesi, Bolt ka deklaruar së fundmi se mund edhe të heqë dorë nga ëndrra e tij për t’u bërë futbollist profesionist pavarësisht se ka shumë oferta dhe se vendimin do ta marrë pikërisht në fund të muajit nëntor. “Ne nuk arritëm një marrëveshje me central Coast, mirëpo kam shumë oferta nga klube të tjera, – ka thënë Bolti. – Tani ne thjesht jemi duke menduar se çfarë do të bëjmë.”

“Vendimi do të merret para fundit të muajit nëntor nëse do të shkoj te ndonjë klub ose jo”, – ka përfunduar xhamajkani. Jusein Bolti  ka bërë prova në disa klube që pas tërheqjes nga atletika, por ka shumë skepticizëm rreth tij, sidomos sa i takon aftësive tekniko-taktike, pasi Bolt nuk ka marrë formim futbollistik në kohën e duhur dhe sado që është i shpejtë, ai nuk arrin të pozicionohet si futbollisti i cili e ka ushtruar këtë sport që në fëmijëri.