ASNN – Shqipëria e Nën-19-vjeçarëve e drejtuar nga trajneri Armando Cungu ka luajtur pasditen e së shtunës ndeshjen e parë vëllazërore me Kosovën në Stadiumin “Egnatia Arena”, një miqësore në kuadër të grumbullimit që kuqezinjtë po zhvillojnë si përgatitje për turneun eliminator të UEFA-s që do të zhvillohet në muajin shtator në Belgjikë, ku skuadra e Cungut do të luajë ndaj vendasve, Spanjës dhe Rusisë.

Ndeshjen e së shtunës skuadra e filloi me këtë formacion: Dema, Hysaj, Abazaj, Azizi, Betezelis, Ndoci, Shkurti, Daka, Lika , Torraj dhe Toma. Pjesa e parë e ndeshjes ishte i barabartë në lojë, me të dy skuadrat që tentuan shumë herë t’u afrohen portave përkatëse, për të gjetur epërsinë, të cilin e gjeti Kosova në minutën e 28-të me Eridon Malokun

Ky gol vendosi dhe fatin e pjesës së parë, që u mbyll 0-1. Në fillimin e pjesës së dytë Kosova gjeti dhe golin e dytë në minutën e 55-të, me Rinor Toverlanin. Kuqezinjtë morën kontrollin e lojës në dorë dhe iu afruan shumë herë golit që do të rihapte ndeshjen, por pa arritur të finalizojnë me sukses. Ky test i parë miqësor i ka vlejtur shumë trajnerit Cungu për të parë në aksion shumë lojtarë të rinj që i janë bashkuar për herë të parë skuadrës.

Më datë 28 mars do të luhet testi i dytë, përsëri në Egnatia Arena të Rrogozhinës.

Nën-19-vjeçarët

Shqipëri – Kosovë                0-2

Shënues: Maloku 28′, Toverlani 55′

Shqipëria: Dema, Hysaj, Abazaj, Azizi, Betezelis, Ndoci, Shkurti, Daka, Lika , Torraj, Toma. U aktivizuan: Zabeli, Taleb, Tozaj, Topi, Gjoka, Nako, Musaj, Kurti.

Kosova: Shala, Mehaj, Avdimetaj, Rexhepi, Lubishtani, Toverlani, Ajvazi, Haskaj, Hasani, Rashica, Maloku.