ASNN – Kombëtarja shqiptare e Nën-17-vjeçarëve në futboll ka zhvilluar të shtunën mbrëmje ndeshjen e dytë në Eliminatoret e Evropianit për këtë grupmoshë, atë ndaj Skocisë. Kuqezinjtë e drejtuar nga trajneri Ervin Bulku bënë një paraqitje të mirë dhe luajtën deri në fund si të barabartë me skocezët, të cilët, sidoqoftë, fituan në fund me rezultatin 3-2 në një ndeshje plot emocione. Shqipëria e Nën-17-vjeçarëve e nisi ndeshjen me këtë formacion: Kiri, Koleci, Ad. Kurti, Ar. Kurti (kapiten), Xhixho, Kosmallari, Sulejmani, Tresa, Kasa, Fikaj dhe Haxhari.
Kuqezinjtë e nisën mjaft mirë dhe në minutën e 12-të kaluan në epërsi me anë të mesfushorit Oresti Kosmallari, i cili fiksoi shifrat në 1-0. Në minutën e 26-të gjyqtari hungarez i sfidës, Ferenc Karako akordoi një 11-metërsh në favor të skocezëve. Goditja nga pika e bardhë e skocezit Uilson u ndal me sukses nga portieri Kiri. Por, vetëm një minutë më pas, në të 27-tën, Uilson do të ndreqte shënjestrën, duke shënuar golin e barazimit për Skocinë. Në pjesën e dytë trajneri Bulku bën disa zëvendësime, por skocezët arrijnë të kalojnë në epërsi e më pas ta trefishojnë atë.
Në fillim është Mur ai që shënon në minutën e 60-të e, më pas, Alen, në minutën e 66-të, duke fiksuar rezultatin në 3-1. Në minutën e fundit të kohës së Endri Damo shënon, duke ngushtuar hendeku në 2-3, teksa në minutat shtesë Damo, i cili kishte hyrë si zëvendësues në pjesën e dytë ndëshkohet me karton të kuq (pas dy kartonëve të verdhë) dhe lë fushën e lojës. Kjo ishte ndeshja e dytë e përfaqësues së Nën-17-vjeçarëve të Shqipërisë në Grupin 12 të Eliminatoreve të Evropianit të kësaj grupmoshe.
Takimi i parë ishte ai i datës 27 tetor 2021, ndaj Italisë, një humbje 5-0, ndërsa më 2 nëntor 2021, kuqezinjtë e Bulkut do të luajnë ndeshjen e tretë dhe të fundit ndaj Irlandës së Veriut.
Eliminatoret e Evropianit
Nën-17-vjeçarët
Skoci – Shqipëri 3-2
Shënues: Uilson 27’, Mur 60’, Alen 66’ / Kosmallari 12’, Damo 90′
Shqipëria e Nën-17-vjeçarëve: Kiri, Koleci (Muça 30’), Ad. Kurti, Ar. Kurti (kapiten), Xhixho (Syla 73’), Kosmallari (Ruci 73’), Sulejmani (Damo 67’), Tresa, Kasa (Ageja 67’), Fikaj, Haxhari. Trajner: Ervin Bulku.
