ASNN – Zyrtarizohet përballja e dyfishtë në javën e dytë me Maqedoninë e Veriut. Kështu, Kombëtarja kuqezi e Nën-17-vjeçarëve do të zhvillojë në shtator dy ndeshje miqësore ndaj përfaqësueses së bashkëmoshatarëve të Maqedonisë së Veriut. Një gjë e tillë është bërë e ditur nga Federata Shqiptare e Futbollit, që në në njoftim të publikuar në faqen e saj zyrtare në internet, sqaron se të dy federatat përkatëse kanë rënë dakord për zhvillimin e këtyre dy ndeshjeve në datat 12 dhe 14 shtator 2022.
Sfida e parë e kuqezinjve të vegjël do të luhet në fushë të huaj, më 12 shtator, ndërsa përballja e dytë do të zhvillohet dy ditë më pas në Shqipërisë, teksa mbeten për t’u përcaktuar stadiumet se ku do të luhen, por edhe orari i takimeve. Këto dy sfida shihen si shumë të vlefshme për ekipin kuqezi, që drejtohet nga trajneri Ervin Bulku, i cili do të testojë dhe do t’u japë mundësi lojtarëve që do të thërrasë të tregojnë cilësitë e tyre, për të vendosur më tej për grupin e futbollistëve që do të përfaqësojnë Shqipërinë në Eliminatoret e Kampionatit Evropian të edicionit 2022/2023 për këtë grupmoshë.
Shorti e ka vënë Shqipërinë është shortuar në grupin e 7-të, së bashku me Suedinë, Kroacinë dhe Uellsin, dhe ndeshjet do të zhvillohen në formën e një mini-turneu në Kroaci në muajin tetor, përkatësisht në datat 20, 23 dhe 26 tetor 2022. Trajneri Bulku ka shfrytëzuar të gjitha datat e mundshme të UEFA-s, por edhe ditë të tjera për të zhvilluar seleksionime e grumbullime me lojtarë nga brenda e jashtë vendit, për të spikatur elementët më të mirë që mund t’i shërbejnë ekipit kombëtar.
Gjithashtu, Shqipëria e Nën-17-vjeçarëve ka zhvilluar edhe disa miqësore përgjatë këtij viti, teksa të fundit ishin ato ndaj Kosovës në muajin qershor, ku kuqezinjtë morën një fitore dhe një barazim. Sakaq, data e grumbullimit të ekipit dhe lista e lojtarëve kuqezi të thirrur për miqësoren ndaj Maqedonisë së Veriut do të bëhen të ditur në javët në vazhdim në faqen zyrtare të FSHF-së.
