ASNN – Turneu i dytë Evropian për këtë vit i organizuar nga FSHF-ja do të nisë të shtunën me ndeshjet e para të “UEFA development” për Nën-16-vjeçarët. Në këtë turne marrin pjesë Shqipëria, Kosova, San Marino dhe Belize, teksa të gjitha takimet do të luhen në fushat e “Shtëpisë së Futbollit” në kryeqytet. Të gjitha skuadrat janë grumbulluar prej disa ditësh dhe po përgatiten për turneun “UEFA development” të kësaj grupmoshe. Në program ditën e shtunë janë dy ndeshje.
Sfida e parë e ditës, San Marino-Kosovë do të luhet duke nisur nga ora 11:30. Më pas do të jetë radha e Kombëtares kuqezi të kësaj grupmoshe për të zbritur në fushë, teksa duke nisur nga ora 14:30, Shqipëria do të përballet me Belizen. Kombëtarja e Nën-16-vjeçarëve është grumbulluar që prej 28 shkurtit në Durrës dhe, sipas asaj që përcjell FSHF-ja, përgatitjet kanë shkuar shumë mirë. Të gjithë futbollistët e grumbulluar nga trajneri Ardi Behari kanë shfaqur formë optimale dhe janë gati për takimin e parë ndaj Belizes.
Përsa i përket kalendarit, ndeshjet e dyta të turneut “UEFA Development U-16” do të zhvillohen më datë 4 mars 2024. Takimi i parë i ditës në “Shtëpinë e Futbollit” do të jetë Belize-San Marino, që luhet duke nisur nga ora 11:30, ndërsa Shqipëria dhe Kosova do të përballen së bashku në orën 14:30. Turneu “UEFA Development” për këtë grupmoshë do të ulë siparin më datë 7 mars 2024, me ndeshjet e fundit. Sfida e parë në “Shtëpinë e Futbollit” do të jetë Kosovë-Belize, që nis në orën 11:30, ndërsa Shqipëri-San Marino do të luhet duke nisur nga ora 14:30.
Më poshtë kalendari i plotë i ndeshjeve:
San Marino – Kosovë 02.03.2024 Shtëpia e Futbollit ora 11:30
Shqipëri – Belize 02.03.2024 Shtëpia e Futbollit ora 14:30
Belize – San Marino 04.03.2024 Shtëpia e Futbollit ora 11:30
Shqipëri – Kosovë 04.03.2024 Shtëpia e Futbollit ora 14:30
Kosovë – Belize 07.03.2024 Shtëpia e Futbollit ora 11:30
Shqipëri – San Marino 07.03.2024 Shtëpia e Futbollit ora 14:30
