ASNN – UEFA Development, Kombëtarja e Nën-16-vjeçarëve nis grumbullimin, trajneri Behari publikon listën për sfidat me Kosovën, San Marinon & Belizen. Federata Shqiptare e Futbollit (FSHF) është gati për organizimin e turneut të dytë evropian për këtë vit. Bëhet fjalë për turneun e grupmoshës Nën-16-vjeçarëve “UEFA Development” për meshkuj, që do të zhvillohet në vendin tonë nga data 2, deri më 7 mars 2024 dhe të gjitha ndeshjet do të luhen në fushat e “Shtëpisë së Futbollit”, siç njihet ndryshe selia e re e FSHF-së në kryeqytet.
Në këtë turne do të marrin pjesë Shqipëria e Nën-16-vjeçarëve, së bashku me Kosovën, San Marinon dhe Belizenë e kësaj grupmoshe. Ekipi kombëtar i Nën-16-vjeçarëve që drejtohet nga trajneri Ardi Behari do të nisë të enjten grumbullimin në Durrës, atje ku do të zhvillohen edhe seancat stërvitore. Trajneri Ardi Behari ka grumbulluar 20 lojtarë për turneun “UEFA Development”. 10-të prej tyre vijnë nga klubet e kampionatit shqiptar, teksa aktivizohen me Partizanin, Tomorin, Akademinë “Pepa”, Tiranën, Skënderbeun, Akademinë e Futbollit dhe Vllazninë.
Pjesa tjetër e futbollistëve luajnë jashtë me klube të ndryshme evropiane si Ternana, Fortuna e Dyseldorfit, Olimpiakosi, Piterboro Junajtid, Juventusi, Xhenoa, Udineze, Totenhemi, Kolni dhe Fermana. Sa i përket kalendarit, ndeshjet e para të këtij turneu do të zhvillohen në datën 2 mars 2024. Takimi i parë në “Shtëpinë e Futbollit” do të jetë San Marino-Kosova, që do të luhet duke nisur nga ora 11:30. Më pas, Shqipëria do të përballet me Belizen në orën 14:30. Ndeshjet e dyta të turneut “UEFA Development16” do të zhvillohen më datë 4 mars 2024.
Takimi i parë në “Shtëpinë e Futbollit” do të jetë Belize-San Marino, që luhet duke nisur nga ora 11:30, ndërsa Shqipëria dhe Kosova do të përballen së bashku në derbin “gjithëshqiptar”, që nis në orën 14:30. Turneu “UEFA Development” për Nën-16-vjeçarëve do të ulë siparin më datë 7 mars 2024, me ndeshjet e fundit. Sfida e parë në “Shtëpinë e Futbollit” do të jetë Kosovë-Belize, që nis në orën 11:30, ndërsa Shqipëri-San Marino do të luhet duke nisur nga ora 14:30. Më poshtë, edhe lista me emrat e 20 lojtarëve të ftuar nga stafi teknik i Kombëtares së kësaj grupmoshe për këto 3 sfidat.
