ASNN – Kombëtarja shqiptare e Nën-15-vjeçarëve ka zhvilluarkëtë të martë miqësoren e parë me përfaqësuesen e bashkëmoshatarëve të Malit të Zi. Ndeshja që u luajt në Podgoricë përfundoi me rezultatin 2-1 në favor të Nën-15-vjeçarëve malazezë, teksa trajneri Armand Dama pati mundësi të shihte në aksion dhe të aktivizonte një pjesë të madhe të lojtarëve të grumbulluar.
Shqipëria e Nën-15-vjeçarëve e nisi sfidën me këtë formacion: Xhemali, Avdullari, Gurra, Qypi, Xhafkollari, Dashi, Laze, Malaj, Rifa, Bytyçi dhe Gici. Në fundin e pjesës së parë përfaqësuesja kuqezi bëri një zëvendësim të detyruar, pasi Avdullari u largua dhe ja la vendin Grazhdanit. Ndërkaq, në pjesën e dytë trajneri Dama aktivizoi edhe lojtarët Topollaj, Nela, Elmazi, Jançe, Muça dhe Kamenica.
Golin e vetëm për Shqipërinë e Nën-15-vjeçarëve e shënoi sulmuesi Tedi Malaj. Përfaqësuesja kuqezi do të zhvillojë edhe ndeshjen e dytë miqësore me Nën-15-vjeçarët e Malit të Zi më datën 28 tetor, po në Podgoricë, duke nisur nga 14:00. Skuadra ka udhëtuar të shtunën drejt Ulqinit ku është të akomoduar dhe është duke u përgatitur për miqësoret.
Grumbullimi do të zgjasë 6 ditë dhe stafi teknik do të ketë mundësi të shohë në aksion lojtarë të vitlindjes 2007. Sakaq, me ekipin nuk mundën të udhëtonin dy futbollistët Hetem Lushaj (Flamurtari) dhe Eljo Nderjaku (Teuta) për probleme fizike. Synimi i këtyre ndeshjeve është për të monitoruar ecurinë dhe gjendjen e këtyre lojtarëve.
Por edhe për të përzgjedhur elementët e perspektivës që mund të jenë të vlefshëm për të kaluar në ekipet kombëtare të Nën-16-vjeçarëve, Nën-17-vjeçarëve e me radhë. Tashmë ka nisur puna për ringritjen e skuadrës për vitin 2021, pasi Shqipëria Nën-15-vjeçarëve do të marrë pjesë në turneun e kësaj grupmoshe “UEFA Development Tournament”.
