ASNN – Mesi apo Ronaldo, kush është më i mirë? Kjo pyetje nuk merr përgjigje të prerë e të menjëhershme, pasi të dy futbollistët kanë arritur shumë në karrierën e tyre magjike. Të dy kanë pasues të shumtë dhe adhurues që çmenden për ta.

Natyrisht, ata janë futbollistë me karakteristika të ndryshme teknike, por sukseset që kanë korrur dhe rivaliteti që kanë pasur si me skuadrat e tyre dhe me treguesit statistikorë, i ka sjellë në nivelet më të larta.

Në lidhje me këtë rivalitet midis Lionel Mesit dhe Kristiano Ronaldos ka folur edhe ylli brazilian, Nejmar, i cili është shprehur se Mesi është një idhull i tij dhe një lojtar që magjeps me lojën e tij.

Kurse për Ronaldon, braziliani thotë se është një lojtar që punon fort, që ka staturë të fortë dhe një fitues i uritur.  “Mesi është padyshim idhulli im në futboll”, – u shpreh Nejmari.

“Fakti që kam luajtur me të më ka bërë më të fortë. Nga ana tjetër, Ronaldo është një monstër, për mua ka qenë një nder ta kisha përballë, një rival i denjë dhe një futbollist mjaft i mirë. Do të mësoj prej tyre, sepse kanë arritur majat dhe kanë fituar si askush tjetër”, – ka përfunduar ai.