ASNN – Ndahet nga jeta ish-trajneri i Kombëtares, Zyber Konçi. Ai ishte trajneri i parë që drejtoi Shqipërinë në një fushatë eliminatore ato të Euro 1964. Futbolli shqiptar është kështu në zi. Pas një sëmundje të rëndë, në moshën 88-vjeçare u nda nga jeta ish-trajneri i Kombëtares Shqiptare të Futbollit dhe një prej figurave më të njohura të trajningut shqiptar, Prof. Dr. Zyber Konçi.

Ai ishte trajneri i parë që drejtoi Shqipërinë në një fushatë eliminatore ato të Euro 1964, ku arriti dhe suksesin e parë historik të kuqezinjve 1-0 ndaj Danimarkës në Tiranë. Konçi e drejtoi Kombëtaren në dy periudha të ndryshme, në tetor 1963-maj 1965 dhe nga shtatori e deri në dhjetor të 1980. I shkolluar në një prej akademive më të mira të botës në Çekosllovaki, ai injektoi në Shqipëri, idetë dhe skemat e trajningut më modern të kohës.

Profesor Doktor Zyber Konçi ka dhënë një kontribut të jashtëzakonshëm edhe në futjen e metodave shkencore në Institutin e Kulturës Fizike dhe Sporteve. Shkëndija e tij e vitit 1970 mbetet e paharrueshme për rezultatet e saj. Për vdekjen e Zyber Konçit reagoi dhe presidenti i FSHF, Armand Duka që e cilësoi humbjen e tij të trishtueshme për futbollin shqiptar, duke e cilësuar atë si një prej figurave më të spikatura të këtij sporti në Shqipëri.

Homazhet në nderim të figurës së tij do të mbahen nesër nga ora 11:30 – 12:30 në hollin e tribunës qëndrore të stadiumit kombëtar “Qemal Stafa”.