ASNN – Kampionati amerikan i basketbollit, NBA, po jep spektakël ditë pas dite e javë pas jave, duke duruar emocione të mëdha në shkallët e pallateve të sportit dhe njëherësh tek telespektatorët e shumtë. Në kuadër të ndeshjeve të radhës, një fitore të bujshme arriti Los Anxhelos Lejkërs, të cilët mundën Sharlotën 128-100, duke marrë një dypikësh me vlerë dhe duke u ngjitur në vend të 4-t në Konferencën e Perëndimit. Për më tepër, fitorja erdhi në fushën e Sharlotës, duke e bërë këtë sukses të ketë mjaft peshë për vazhdimësinë.
Në këtë ndeshje shkëlqeu si zakonisht Lëbron Xhejms, i cili arriti të regjistrojë shifra fantastike individuale, me dy trepikësha si dhe 24 pikë të total, plus 12 topa të kapur në tabelë dhe 11 pasime për kosh. Askush tjetër si ai në statistika individuale, duke dëshmuar një rritje në paraqitjen e tij dhe një lojë magjepsëse. Në këtë ndeshje Xhejmsin e ndihmoi lojtari tjetër i shkëlqyer i Lejkërsave, Lonzo Boll, i cili realizoi 16 pikë, zotëroi 10 topa në tabelë dhe dhuroi 10 pasime të sakta për kosh.
Ndërkohë, po në konferencën e Perëndimit, Okllahoma Siti mposhti Los Anxhelos Klipers me rezultatin 110-104, ku shkëlqeu basketbollisti Xhorxh me 33 pikë. Kjo ishte fitore me vlerë për Klipërs në një duel direkt për kreun në Konferencën e Perëndimit. Në Konferencën e Lindjes, një fitore të ngushtë por domethënëse arriti skuadra e Çikagos që mposhti 98-93 San Antonio Spërsin dhe nga mediat amerikane u quajt rezultat surprizë, pasi “Bulls”-at ndodhen në vend të fundit dhe për ta ishte një fitore krejt e papritur.
Përmbysja e ndeshjes ndodhi në 5 minutat e fundit, duke shtangur ekipin e San Antonio Spërs. Po në këtë konferencë, një fitore të bujshme korri edhe Detroit Pistëns e Miçiganit, ndaj Boston Sëlltikës, me rezultatin 113-104. Në këtë ndeshje shkëlqeu Grifin me 27 pikë, më i miri për ekipin e Miçiganit. Një tjetër fitore me peshë në këtë javë të NBA, mori edhe Hjuston Rokets në udhëtim ndaj Memfisit, të cilin e mundi me shifrat 105-97. Në këtë ndeshje shkëlqeu i gjithi basketbollisti Xhejms Harden që realizoi 32 pikë, zotëroi 12 topa në tabelë dhe dha 10 pasime për kosh, praktikisht ylli i ndeshjes.
